"Улсын чанартай их сургуулиудыг Ховд, Дорнод, Дархан, Эрдэнэт, Сайншанд зэрэг зургаан аймгийн төв рүү нүүлгэх талаарх ТЭЗҮ боловсруулж байгаа. Ирэх жилээс эхлэн ХААИС-ийг Дархан хот руу бүрэн шилжүүлнэ" гэсэн БСШУ-ны дэд сайд Г.Ганбаярын мэдэгдлийг TREND LIVE онцолж байна.

Г.Ганбаяр сайд “Улсын чанартай их дээд сургуулиудыг аймгийн төвүүд рүү нүүлгэх асуудлыг тун удахгүй Засгийн газрын хуралдаанаар хэлэлцэн шийдвэрлэнэ. Ирэх жил гэхэд ХААИС-ийг Дархан руу бүрэн нүүлгэсэн байна. Тухайн сургуулийн дөрвөн хөтөлбөрийг өнгөрсөн хоёр жилийн хугацаанд Дархан руу шилжүүлж, Улаанбаатарт элсэлт аваагүй. Хөдөө аж ахуй, мал аж ахуйн чиглэл Дархан-Уул аймагт илүү тохирно. ШУТИС-ийг Эрдэнэт үйлдвэрт түшиглэж хөгжүүлнэ. Ховд, Дорнод хотуудад боловсрол, эрүүл мэндийн чиглэлийн сургуулиудыг шилжүүлнэ. Харин Дорноговь аймагт уул уурхай, хүнд үйлдвэрийн чиглэлийн сургуулиудыг нүүлгэн шилжүүлэх бодлого барьж байгаа” хэмээн хэлсэн нь олны талархлыг хүлээж, ихээхэн хандалт аваад байна.

Монгол Улсын нийслэлийн Улаанбаатар хотын ачаалал түгжрэл жилээс жилд өсөж, бөглөрч, түгжирч байгаагийн хамгийн гол шалтгаан нь монголын их дээд сургуулиуд бараг бүгд нийслэлдээ төвлөрснөөс үүдэлтэй. 2010 оноос эхлэн улсын чанартай их дээд сургуулиудыг Багахангай, Багануур, Налайх дүүрэг рүү нүүлгэх асуудал яригдаж эхэлсэн ч өнөөг хүртэл ажил хэрэг болоогүй юм.

---