Их Британийн "Imperial College London" буюу Лондоны Эзэн хааны коллежийн энэ жилийн "Maker Challenge" инновацын тэмцээний хоёр ба гуравдугаар байрыг монгол ихэр охид хүртсэн байна. 

"Maker Challenge" хөтөлбөр нь орон нутгийн сургуулиудын 14-18 насны хүүхдүүдэд өөрсдийн бүтээгдэхүүн, багаж хэрэгслийн анхны загварыг боловсруулж, "3D"-гээр хэвлэх, лазераар зүсэхээс эхлээд бүтээлээ танилцуулах, харилцаа холбоогоо хөгжүүлэх зэрэг олон төрлийн ур чадвар эзэмшихэд нь дэмжлэг үзүүлдэг аж. 

Энэ жилийн хөтөлбөр цар тахлын улмаас цахим хэлбэрээр зохион байгуулагдсан бөгөөд "COVID-19-ийн дараах амьдрал" гэсэн сэдэвтэй байжээ. Сурагчид коронавирусийн улмаас хүндрэлтэй болсон амьдралын талбаруудын талаар бодож, түүнд нийцсэн дизайн зохион бүтээх үүрэгтэй байсан аж.

Тэгвэл уг тэмцээний хоёр, гуравдугаар байрыг Лондон хотын "White City" дүүргийн сургуулийн ихэр сурагчид болох Есүй, Есүгэн нар сэтгэцийн эрүүл мэнд, виртуал ядаргааны талаар хийсэн төслөөрөө гардан авсан байна. 

14 настай Есүй хөл хорионы үеийн үеийн сэтгэцийн болон бие махбодын эрүүл мэндийн талаар шинжилж үзжээ. Ингээд тэрээр нийтийн тээврийн хэрэгслийн хэрэгцээг хязгаарлаж, хүмүүсийг спортоор хичээллэхийг уриалж, мөн стрессээ тайлахад нь тусалдаг "Томоко" нэртэй хамгаалалтын малгайг зохион бүтээсэн байна. Энэхүү хамгаалалтын малгай стресс тайлах зөөврийн массажны аппарат болон ихэнх гуталд бэхэлж болох салдаг дугуй зэргийг агуулдаг аж.

Тэрээр "Maker Challenge нь намайг зохион бүтээгч шиг сэтгэж, хатуу, зөөлөн ур чадвараа хоёуланг нь ашиглаж, шинжлэх ухаан, технологи, инженерчлэл, математикийн мэргэжлүүдийн талаар цаашдын судалгаа хийхэд надад тусалсан" хэмээн ярьжээ.

Харин Есүгэн цар тахлын үед хүмүүсийг идэвхтэй байхад нь туслах зорилгоор "Мичка" нэртэй олон төрлийн хэрэглээтэй усны савыг бүтээжээ. Уг усны сав нь "BPA" химийн бодис агуулаагүй бөгөөд царцсан хуванцар материалаар хийгдсэн аж. Мөн салдаг шилэн аягатай ба доод талдаа гар чийдэнтэй гэнэ. Энэ нь Үндэсний эрүүл мэндийн үйлчилгээний ажилтнууд болон бусад гол ажилчдын ажилдаа ирж, буцах аяллыг нь хөнгөвчилж, дасгал хөдөлгөөн хийн, сэтгэцийн эрүүл мэндээ сайжруулахад нь туслах зорилготой байна.

Есүгэн мөн ирээдүйд хувиараа бизнес эрхлэгч болох зорилготой гэдгээ онцолжээ.

Тэрээр "Би бүтээгдэхүүн эсвэл программ хангамжаар дамжуулан асуудлыг шийддэг хүн болохыг хүсэж байна. Учир нь үүнд бүтээлч сэтгэлгээ ба бага зэргийн туршилт шаардлагатай" хэмээн тэмдэглэсэн байна.

Эх сурвалж: imperial.ac.uk

---