Уул уурхай, хүнд үйлдвэрийн сайд Гэлэнгийн Ёндонгийн өмнө эрхэлж байсан ажил, албан тушаалтай холбоотой ноцтой баримт өнгөрсөн долоо хоногт цацагдсан билээ. 

Тэрээр 2019 оны дөрөвдүгээр сарын 19-ний “Монголросцветмет” ТӨҮГ-ын орлогч захирлаар томилогдож байсан бөгөөд тухайн албан тушаалд томилогдсоноос хойш ердөө тавхан сарын дараа байгууллагынхаа 10,700,000 мянган төгрөгөөр Гёте бүрэн дунд сургуульд сурдаг хоёр хүүхдийнхээ сургалтын төлбөрийг төлүүлж байсан байдаг.

Тэрээр энэ талаараа ямар нэгэн тайлбар хийх нь зөв гэж үзсэн ч хэвлэлийн хурал зарлахаас яагаад ч юм эмээжээ. Иймд өөрийн яамтай гэрээтэй ТВ-5 болон Ийгл ТВ-ийг дуудан, энэ талаараа тайлбар хийсэн нэр зүүлээ. 

Түүний ярьж байгаагаар "Монголросцветмет нэгдэл хэрэв ашигтай ажиллавал удирдлагуудад хөнгөлөлт, урамшуулал өгөх журам байдаг. Тэр дагуу хүүхдүүдийнхээ төлбөрийг төлүүлсэн. Хувь хүний хувьд болохгүй юм хийсэн гэж бодохгүй байна" хэмээв.

---