Манай улсад орон даяар цэрэг татлага явагдаж байна. Энэ жил сайн дураар цэргийн албанд явах хүсэлт их байгаа. Бүтээн байгуулалтын ажилд цэрэг эрсийг оролцуулж мэргэжлийн үнэмлэх, цалин олгож байгаа нь залуусын идэвхийг нэмэгдүүлсэн. Мөн төрийн албанд ажиллахад цэргийн алба хаасан байх шаардлага нь сайн дурын алба хаагчдын тоог нэмэгдүүлжээ.

БЗД-ийн ЗДТГ-ийн Цэргийн штабын тоо бүртгэлийн офицер, дэд хурандаа Э.Амарбат "Өнөөдөр 2020 оны 2-р ээлжийн цэргийн жинхэнэ алба татлага явагдаж байна. Коронавирусийн цар тахалтай холбоотой 2020 оны нэгдүгээр ээлжийн цэрэг татлага хийгдээгүй. Тиймээс энэ удаа нэгтгэн цэрэг татлага болж байгаа. Мөн халдвар тахлын үед зохион байгуулж байгаа ч залуусын идэвх их өндөр байна. Бүтээн байгуулалтын ажилтай холбоотой залуус мэргэжил эзэмшээд цалин аваад албаа хааж байгаа нь энэ идэвхийг нэмж байгаа. Цэргийн албанаас айж шантралгүй, нэр төртэйгөөр албаа хаахыг, хуулиар хүлээсэн үүргээ биелүүлэхийг уриалж байна" гэсэн юм. 

Цэрэг татлагаар тэнцэхгүй байгаа гол шалтгаан бол эрүүл мэндийн шалтгаан юм. Өөрөө ямар нэг хууч өвчтэй байснаа мэдээгүй. Энэ цэрэг татлагад ирснээр эрүүл мэндийн байдлаа мэдэж авч эмчлүүлээд ахин цэрэг татлагадаа хамрагдах боломжтой юм.

БЗД-ийн 26-р хорооны Засаг дарга Отгоо "Сайн дураар алба хаах нэг залуу манай хорооноос ирсэн. 583 ширхэг зарлан ирсний 80 гаруй хувь нь тараагдсан. Залуучууд маш идэвхтэй ирж хамрагдаж байна" гэлээ. 

БЗД-ийн 27-р хорооны засаг дарга "Өмнөх жилийн цэрэг татлагаас илүү нэмэгдсэн. Сайн дураараа татагдах 25 залуугаа хамгийн түрүүнд оруулсан. Тэнцээд явахад бэлдэж байна. Хууль, хүчний сургууль, төрийн албан хаагч болохоор зорьж байгаа залуучууд цэргийн алба хаахаар зорьж ирж байгаа.

Залуус: Аав, ах маань цэргийн алба хаасан. Эр хүн алба хаах ёстой гэж боддог учраас цэргийн алба хаахыг хүссэн. Хил дээр алба хаамаар байна. Эх орноо хамгаалах, эр хүн болсныхоо үүрэг хариуцлагыг хүлээх сайхан санагдаж байна.

---