Замын-Үүдийн боомтоор БНХАУ-ын иргэд өчигдөр орой орж ирсэн гэсэн мэдээлэл гарсан. Ямар учиртай хүмүүс хил нэвтэрсэн талаар ЦЕГ-ын дэд Ж.Амгалан, ХХЕГ-ын дарга Ж.Бямбасүрэн нар тайлбар өглөө.

-Замын-Үүдийн боомтоор энэ сарын 21-нд 15:00-16:00 цагийн хооронд Монгол Улсын Засгийн газар, УОК-ийн шийдвэрийн дагуу улс орны нэн яаралтай бүтээн байгуулалтад оролцох 100 хятад иргэнийг хилээр нэвтрүүлэх үйл ажиллагаа болсон. 7-8 автобус дүүрэн хууль бус хятад иргэдийг хилээр нэвтрүүлсэн гэх худал мэдээлэл явсан.

100 хятад иргэн ирснээс 74 иргэнийг хилээр нэвтрүүлж, тусгаарлах байр руу автобусаар хүргэсэн.

Нэг автобусанд суусан хятад иргэн 37 хэмээс дээш халуурсан тул тус автобусанд байсан 26 хятад иргэнийг хил дээрээс нутаг буцаасан. Хилээр нэвтэрсэн 74 иргэн 21 хоног тусгаарлагдан Налайх, Дархан-Уул аймгийн авто замын бүтээн байгуулалтад оролцоно. Дээрх иргэдээс коронавирусийн халдварын шинжилгээ авсан. Одоогоор хариу гараагүй байна.

Хил хаагдсанаас хойш бүтээн байгуулалтад оролцох гадаадын 1000 орчим инженер, техникийн ажилтныг нэвтрүүлсэн. Эдгээр иргэдийн визийн асуудлыг Гадаадын иргэн, харьяатын газар хяналт тавьж ажиллана.

 

---