Өмнөд Солонгосын Инчон хотын оршин суугч өсвөр насны хүү улирлын томуугийн вакцин хийлгэснийхээ дараа нас барсан байна. Гэвч түүний үхлийн шалтгаан хараахан тодорхой болоогүй байгааг эрүүл мэндийн албаныхан онцолсон юм.

Нэрийг нь нууцалсан 17 настай хүү өнгөрсөн долоо хоногийн лхагва гарагт вакцин хийлгээд, баасан гарагийн өглөө нас барсан болохыг тус улсын Халдварт өвчнийг хянах, урьдчилан сэргийлэх агентлагаас мэдээлжээ. Тус агентлагийн захирал Жонг Ын-Кёнг "Вакцин тарилгын дараа түүнд ямар нэгэн гаж нөлөө илрээгүй бөгөөд тэрээр тодорхой хугацааны дараа нас барсан тул үхлийн шалтгааныг нь тогтоох шаардлагатай" хэмээсэн байна.

Түүнчлэн хүүг "Shinsung Pharm" компанийн нийлүүлсэн вакцинаар тарьсан гэдгийг агентлагийн мэдэгдэлд дурджээ. Энэхүү компанийн нийлүүлсэн зарим вакцин тээврийн явцад өрөөний температурт задарч, хадгалалтын горим нь алдагдсан болох нь ил болж, нэлээд шуугиан тариад байгаа билээ. Эдгээр вакцинаас тариулсан хүмүүсийн дунд хэвийн бус урвалын нийт 80 тохиолдол бүртгэгдээд байгаа юм.

Тэгвэл эрх баригчид эдгээр хадгалалтын горим алдагдсан вакцинууд чанарын шалгалтад тэнцсэн бөгөөд аюулгүй байдлын ямар нэгэн асуудалгүй хэмээн дүгнэсэн. Гэсэн хэдий ч тэд "Shinsung Pharm"-ын 539 мянган тунг буцаан татсан байна.

Харин талийгаач хүүгийн тариулсан вакцин нь тээвэрлэлтийн асуудалгүй байсныг Жонг онцолжээ.

Эх сурвалж: Yonhap News Agency

 

---