“Жаст групп” ХХК-ийн захирал Ш.Батхүү, “Алтжин групп” компанийн захирал Г.Алтан, түүний хүү Э.Сүрэн, “Эрдэнэт үйлдвэр”-ийн гүйцэтгэх захирал асан Ч.Ганзориг, тус үйлдвэрийн Хуулийн хэлтсийн дарга асан Б.Мөнхжаргал, Худалдааны хэлтсийн даргаар ажиллаж байсан Г.Амарбат нарт холбогдох хэргийг Хан-Уул дүүргийн Эрүүгийн хэргийн анхан шатны шүүх ес дэх өдрөө хэлэлцэж, 17:30 цагт түр завсарлан, ирэх даваа гарагийн 09:00 цагаас үргэлжлүүлэн хэлэлцэхээр боллоо.

Энэ сарын 5-ны даваа гарагаас эхлэн хэлэлцсэн уг шүүх хурал эхний өдрүүдэд шүүгдэгч нарын мэдүүлэг, прокурорын яллах дүгнэлтийг уншиж сонсгох зэрэг Эрүүгийн хэрэг хянан шийдвэрлэх тухай хуульд заасан ажиллагааг хийсэн бөгөөд шүүхийн хэлэлцүүлгийн нотлох баримт шинжлэн судлах явц нэлээд олон хоног үргэлжилж энэ сарын 16-ны үдээс өмнө дууслаа. Эх сурвалжуудын мэдээлж буйгаар өмгөөлөгч нар цагаатгах, прокурорууд болон хохирогч Төрийн банкны төлөөлөл зэрэг хүмүүс дээрх шүүгдэгч нарыг яллах нотлох баримтууд шүүх хурлын явцад хэлэлцүүлэх саналаа хэлэхийн тулд бүтэн нэг цаг зарцуулсан байна. Зөвхөн хавтаст хэрэгт байгаа хуудсуудын дугаарыг хэлэхийн тулд бүтэн нэг цаг зарцуулсан гэж тооцохоор нотлох баримт шинжлэх ажиллагаа олон хоног үргэлжлэх нь аргагүй.

“Жаст групп”-ийн захирал Ш.Батхүүгийн хувьд хуурамч бичиг баримт үйлдэн “Эрдэнэт үйлдвэр”-ийг барьцаалж, Өмнөд Африкийн “Стандарт” банкнаас их хэмжээний зээл авсан хэрэгт холбогдсон. Прокурорын байгууллагаас Ш.Батхүүг тухайн үеийн “Хадгаламж банк” (одоогийн Төрийн банк)-ийг зээлийн батлан даагчаар оролцуулах баримт бичиг хуурамчаар үйлдсэн, “Эрдэнэт үйлдвэр”-ийн эрх бүхий албан тушаалтнууд болох Б.Мөнхжаргал, Г.Амарбат, Ч.Ганзориг нартай үгсэн тохиролцож, бүлэглэн “Стандарт” банкнаас хуурамч материал бүрдүүлж зээл авч, тус үйлдвэрт хохирол учруулсан гэх үйлдэлд Эрүүгийн хуулийн 22.12-1-д заасан “Хуулийн этгээдийн удирдах, гүйцэтгэх албан тушаалтан хувьдаа, бусдад давуу байдал тогтоох, ашиг хонжоо олох зорилгоор хууль, түүнд нийцүүлэн гаргасан захиргааны хэм хэмжээний акт, хэлцэл, дүрмээр олгогдсон албан тушаалын эрх мэдлээ урвуулан ашигласны улмаас үлэмж хэмжээний хохирол учруулсан”,“Жаст групп” компаниас “Хадгаламж” банктай Төлбөрийн баталгаа, Банкны баталгааны гэрээ байгуулсан гэх үйлдэлд нь Эрүүгийн хуулийн 23.2-1, 23.2-2 дахь хэсэгт заасан хуурамч бичиг баримт гаргасан, Эдуард Сүрэнгийн нэхэмжлэлээр Ш.Батхүү нь “Олон овоот гоулд” ХХК-ийн зээлийн төлбөрт “Хадгаламж” банкнаас төлбөр гаргуулж, тус банкийг хохироосон үйлдэлд дээрх хуулийн 21.1-1 дэх хэсгийн нотлох баримт хуурамчаар үйлдсэн,“Мах Маркет”, “Жаст ойл”, “Олон овоот гоулд” ХХК-ийн хувьцаа болон “Жаст групп”-ийн өмчлөлийн 12 орон сууц, үл хөдлөх хөрөнгийг бэлэглэл болон худалдах гэрээгээр дамжуулан шилжүүлж, үнэгүйдүүлэн мөнгө угаасан үндэслэлээр эл хуулийн 18.6-2.2 дугаар зүйлд зааснаар буруутган яллагдагчаар тооцон шүүхэд шилжүүлсэн билээ.

Харин Г.Алтангийн хүү Эдуард Сүрэнг ээжтэйгээ болон Ш.Батхүүтэй үгсэн тохиролцож, бүлэглэн “Хадгаламж” банкийг Зээлийн батлан даагчаар оролцуулж зээлийн төлбөрийг төлүүлэх үйлдэлд Эрүүгийн хуулийн 17.3-2.2, 17.3-3.3 зүйлд зааснаар залилах гэмт хэргийг зохион байгуулалттайгаар байнга үйлдэж, амьдралын эх үүсвэрээ болгосон гэж буруутгаж шүүхээр гэм буруутай, эсэхийг нь хэлэлцүүлж байгаа юм. Шүүгдэгч нарын мэдүүлэгтэй танилцах үед тэд “Ямар ч гэм буруутай үйлдэл хийгээгүй, улсыг, “Эрдэнэт үйлдвэр”-ийг, “Төрийн банк”-ийг хохироогоогүй байхад прокурор, мөрдөх байгууллагаас үндэслэлгүйгээр буруутган шүүх хурал хийж байна” хэмээн мэдүүлсэн аж.

Нотлох баримт шинжлэн судлах олон өдрийн явцад Э.Сүрэн, Г.Алтан нарыг хуурамч бичиг баримт үйлдэн тухайн үеийн “Хадгаламж”, өнөөгийн “Төрийн банк”-анд хохирол учруулж, залилан мэхэлсэн гэдгийг шүүхийн шинжилгээний байгууллагын шинжээчид бичиг баримтын шинжилгээ хийж тогтоосныг ч эш татаж байсан юм.

Хурал ирэх долоо хоногийн эхэнд үргэлжлэхдээ прокурор яллах саналаа, өмгөөлөгч нар шүүмжээ тус бүр хоёр удаа хэлж, дараа нь шүүгдэгч нар үг хэлснээр завсарлах ёстой. Гэхдээ даваа гарагт энэ бүхэн багтах, эсэх нь эргэлзээтэй. Шүүх бүрэлдэхүүн хэчнээн хугацаагаар зөвлөлдөхийг хэн ч мэдэхгүй. Тиймээс шийтгэх тогтоолоо шүүх бүрэлдэхүүн мягмар гарагт багтаан танилцуулахгүй ч байж болзошгүй юм.

---