Канадын өсвөр насны палеонтологи сонирхогч хүү аавтайгаа Альбертагийн эртний үлэг гүрвэлийн араг ясаар баялаг газарт алхаж байгаад хад чулуун дундаас ямар нэг зүйл товойж байгааг олж харжээ. Өнгөрсөн долдугаар сард болсон үйл явдлаас хойш мэргэжлийн палеонтологичид малтлага явуулж пүрэв гарагт ажлаа дууссан байна.

Натан Хрушкин нэртэй хүүгийн олсон араг яс нь 70 сая жилийн өмнө амьдарч байсан ховор үлэг гүрвэлийнх болохыг судлаачид тогтоожээ. Түүний санамсаргүй олж харсан зүйл олон арван сая жилийн өмнөх үлэг гүрвэлийн яс байсан гэдгийг мэдээд маш их гайхсан хэмээн хүү ярьжээ.

Натан зургаан настайгаасаа эхлэн үлэг гүрвэлийн талаар сонирхон судалж, аавтайгаа хамт Канадын тусгай хамгаалалттай Альбертагийн Бэдлэндсээр алхдаг зуршилтай болжээ. Тэд жилийн өмнө үлэг гүрвэлийн араг ясны жижиг хэлтэрхий олж байсан байна.

Эртний олдворууд Канадын хуулиар хамгаалагдсан байдаг учир тэд үлэг гүрвэлийн араг яс байж болзошгүй зүйлийг олсон даруйдаа гэртээ харьж Royal Tyrrell музейн цахим хуудас руу зургийг нь явуулж, байршлыг нь зааж өгчээ.

Канадын геологич Жозеф Тайррелл 1800-аад оны үед Альбертод байдаг Бэдлэндсийг эртний үлэг гүрвэлийг араг ясаар баялаг газар болохыг нээж Альбертозаврус хэмээн нэрлэж байжээ. Хожим түүний нэртэй үлэг гүрвэлийн музейг нээсэн байна.

Аав хүү хоёр хавцлын хананаас 30-50 ширхэг үлэг гүрвэлийн араг яс олсон нь бүгд 3-4 настай Хадрозаврын үлдэгдэл байжээ. Эдгээр бяцхан Хадрозаврууд 70 орчим сая жилийн амьдарч байсан гэдгээрээ шинжлэх ухааны үнэтэй олдвор болж байна. Учир нь ийм эртний үлдэгдэл олдох нь тун ховор ажээ.

Эх сурвалж: BBC  

---