ХБНГУ коронавирусийн цар тахлын улмаас хүнд хэцүү байдалд ороод буй Холокостоос амьд үлдсэн хүмүүст хагас тэрбум гаруй еврогийн тусламж үзүүлэхээр болжээ.

Мөнгөн тусламжийг дараагийн хоёр жилийн хугацаанд Израил, Хойд Америк, хуучин Зөвлөлт Холбоот Улс, Баруун Европ болон дэлхийн бусад өнцөг булан бүрд буй 240 мянга орчим амьд үлдсэн хүнд олгох гэнэ. Энэ талаар Германы засгийн газартай нөхөн төлбөрийн талаар хэлэлцээр хийдэг "Claims Conference" байгууллага мэдээлсэн юм.

75 жилийн өмнө дууссан Дэлхийн II дайны Холокостоос амьд үлдсэн хүмүүс бүгд өндөр настан болсон бөгөөд ихэнх нь залуу насандаа хангалттай хоол тэжээл идэж чадаагүй тул одоо олон төрлийн эрүүл мэндийн асуудлаар зовж шаналдаг. Мөн олон хүмүүс гэр бүл, хамаатан саднуудаа алдаж, ганцаардмал амьдралаар амьдардаг бөгөөд нацистуудын гарт амссан зүйлсээсээ болж одоог хүртэл сэтгэлзүйн асуудалтай тулгардаг байна.

Түүнчлэн амьд үлдэгсдийн ихэнх нь ядуурлын шугамд хамаардаг тул амны хаалт болон бусад хамгаалалтын хэрэгсэл, хүргэлтийн хүнсний бараа ба цар тахалтай холбоотой бусад зардлууд олон хүний хувьд хүндээр тусч байгаа гэнэ. Энэхүү шинэ тусламжийн төсөв нь одоогоор Германаас тэтгэвэр авдаггүй еврейчүүд буюу дайны үеэр Орос болон бусад улс руу дүрвэсэн хүмүүст зориулагдсан аж.

Эдгээр амьд үлдсэн хүмүүс ойрын хоёр жилийн хугацаанд тус бүрдээ 1,200 евро буюу 1,400 ам.долларын нөхөн төлбөрийг хоёр удаа хүлээн авах бөгөөд нийт 564 сая евро буюу 662 сая ам.доллар тараагдах юм.

1952 оноос хойш "Claims Conference" байгууллагатай хэлэлцээр хийж эхэлсэн Германы Засгийн газар одоог хүртэл Холокостын нөхөн төлбөрт 80 гаруй тэрбум ам.доллар төлжээ.

Эх сурвалж: Associated Press

---