БНХАУ-ын дарга Ши Жиньпин өнгөрсөн мягмар гарагт өмнөд нутгийн Гуандун муж дахь цэргийн баазад зочлохдоо цэргүүдийг "Бүх сэтгэл зүрх, эрч хүчээ дайнд бэлтгэхэд" зориулахыг уриалжээ.

Тэрээр Чаожоу хот дахь Хятадын Ардын Чөлөөлөх Армийн Тэнгисийн цэргийн хүчинд шалгалт хийх үеэрээ цэргүүдийг өндөржүүлсэн бэлэн байдалтай байхыг анхааруулаад, тэднийг "Туйлын үнэнч, туйлын ариун шударга, туйлын найдвартай" байхыг уриалсан байна.

Ши Жиньпиний Гуандунд хийсэн айлчлалын гол зорилго нь 1980 онд гадаадын хөрөнгө оруулалтыг татах зорилгоор байгуулагдан, Хятадын эдийн засгийг дэлхийн хоёр дахь том хүчин болоход чухал үүрэг гүйцэтгэсэн Шэньжэний эдийн засгийн тусгай бүсийн 40 жилийн ойд зориулан үг хэлэх явдал байсан юм. 

Гэвч энэхүү цэргийн айлчлал БНХАУ, АНУ-ын хоорондын хурцадмал байдал сүүлийн хэдэн арван жилд хамгийн дээд цэгтээ тулаад байгаа үед тохиосон. Тайванийн талаарх санал зөрөлдөөн болон коронавирусийн цар тахлын улмаас Вашингтон, Бээжингийн хооронд том хагарал үүсээд байгаа билээ.

Цагаан ордноос Тайваньд гурван дэвшилтэт зэвсгийн системийг худалдахаар төлөвлөж байгаагаа АНУ-ын Конгресст энэ даваа гарагт мэдэгдсэн байна. Үүний хариуд Хятадын Гадаад хэргийн яамны хэвлэлийн төлөөлөгч Жао Лижян Вашингтонд хандан "Тайваньд зэвсэг худалдах төлөвлөгөөгөө даруй цуцалж, АНУ-Тайванийн цэргийн бүх харилцаагаа таслан зогсоохыг" шаардсан аж.

Хэдийгээр Хятадын эрх баригч Коммунист нам хэзээ ч Тайванийг хянаж байгаагүй ч Бээжингийн эрх баригчид энэхүү ардчилсан, өөртөө засах эрхтэй арлыг тэдний нутаг дэвсгэрийн салшгүй нэг хэсэг гэж бат үзэж байгаа бөгөөд Ши Жиньпин хэрэв шаардлагатай бол цэргийн хүч хэрэглэнэ гэдгээ мэдэгдээд байгаа юм.

Эх сурвалж: CNN

---