Ж.Эрдэнэбатын Засгийн газрыг унагасан УИХ-ын гишүүд "кнопны шагнал"-аа хүртсэн нь өдөр ирэх бүрт тодорхой болж байгаа. Жижиг дундаас зээл авсан гишүүдийн тоо улам нэмэгдэж, цаана нь үлдэж байгаа 28 Төрийн тусгай санг шалгавал "Хүрээний бузрыг ухвал далай" болох шиг байна. Жижиг дундаас зээл авсан гишүүд дотроос "Газар капитал партнерс" ББСБ-тай, хамгийн их хөрөнгөтэй гишүүний нэгд тооцогддог УИХ-ын гишүүн Ж.Энхбаяр зээл авсан нь олон хүнийг гайхшруулсан.

Монгол улсын Ерөнхий сайд болох боломжтой, 4 тэрбум 253 сая төгрөгийн жилийн орлоготой, банкин дахь дансандаа 4.7 тэрбум төгрөгийн хадгаламжтай энэ ирээдүйтэй залуу өөрийн ирээдүйг Жижиг дундын 950-хан (хөрөнгөтэй нь харьцуулбал өчүүхэн мөнгө) сая төгрөгөөр сольж орхисон. 

Тэрээр хоёр хоногийн өмнө хуралдсан МАН-ын Удирдах зөвлөл дээр УИХ-ын гишүүний бүрэн эрхээсээ татгалзаж, шалгуулна. Үнэн мөнөө олж эргэж ирнэ гэж хэлжээ. Хулгайлсан хөрөнгө нь баригдангуут буцаагаад өгчихөөр хулгайч биш болох уу? Ингэлээ гээд шударга ёсыг нэхсэн ард түмэн уучлах болов уу? 

---