Ерөнхий сайд У.Хүрэлсүхийн ааш авирын талаар намынх нь гишүүд сүүлийн үед өөр зуураа хурцаар ярих болжээ. Хүн эвдэрнэ гэж монголчууд ярьдаг. Түүн шиг Ерөнхий сайд маань их эвдэрч байгаа гэнэ. Түүний аманд “пээдэлзэх”, “бацаан”, “чам шиг юм”, “новш минь” гэдэг үгс мөнхөд “жижүүрлэх” болсон ба ааш авираа таниулж, эвдэрч буйгаа чуулган болон бүлэг дээр хэд хэдэн удаа гаргаад амжлаа.

2017 оны 11 дүгээр сарын 2-ны чуулган дээр УИХ-ын гишүүн Ж.Мөнхбаттай хэрхэн “нээлттэй” хэрэлдсэнийг та бүхэн санаж буй. Тэдний хооронд ийм сөрглдөөн болсон байдаг.  

Ж.Мөнхбат: -Энэ засгийн газрын хамгийн эмзэг цэг нь Сангийн сайд Ч.Хүрэлбаатар боллоо. Ерөнхий сайд та уул уурхайн лицензтэй хүн танхимдаа авахгүй гэсэн мөртлөө яагаад ийм хүнийг зүтгүүлээд байгаа юм бэ?
У.Хүрэлсүх: -Чамаар заалгах юм уу, Чи дуугүй бай. Солиороод байгаарай чи.
Ж.Мөнхбат: -Би саналаа хэлж байна. Чи харин өөрөө солиор.
У.Хүрэлсүх: -Чи хэн болчихоод олон юм яриад байгаа юм, новш минь. Муу хулгайч. Байрандаа байгаарай
Ж.Мөнхбат: -Чи Хаан юмуу, Заан юмуу. Чи Ерөнхий сайд болоод Н.Энхбаяраас том болжээ. Чи Монголын төрөөс хулгай хийгээгүй юу?
У.Хүрэлсүх: -Чи муу нүүрсний хулгайч бацаан. Чиний идсэн, уусан бүх юмыг чинь дэлгэнээ.
Ж. Мөнхбат: -Чи ч гэсэн намынхаа юмыг идээ биз дээ?
У.Хүрэлсүх: -Чамайг казинод тоглоод явж байхад чинь өөд нь татсан нь буруу болоо юу. Муу казиночин минь.
Ж.Мөнхбат: -Харин чамайг Австралид ажилгүй хэвтэж байхад чинь дуудаж Шадар сайд болгосон нь буруудаж. 
У.Хүрэлсүх: -Монголын төрөөс хулгайлсан болгоныг чинь мэднэ. Авлига авч томилсон бүх хүнийг чинь хална аа. Чамайг байранд нь тавих болсон байна.
Ж.Мөнхбат: -Чи ч гэсэн намын мөнгөнөөс хулгайлсан биз дээ. Би бүх баримтыг ил гаргаж тавина аа. Чи муу битгий солиороод байгаарай гэхчлэн хэрэлдсэн байдаг. Ерөнхий сайд хүний зангараг гэж байх ёстой боловч түүний ярианаас өөртөө эрдсэн, их зан цухалзаж байгааг харж болно.

Гэтэл хэдхэн хоногийн өмнө бас ийм нэгэн хэрүүл УИХ-ын гишүүн Ж.Ганбаатарын хооронд болсон нь сэтгүүлчдийн чихний хажуугаар өнгөрсөнгүй.

2018 оны 10 сарын 29-ний МАН-ын бүлгийн хурал дээр Ерөнхий сайд Засгийн газрыг хөнтөрч мэдэх Жижиг дунд үйлдвэрлэлийн зээлтэй холбоотой бухимдлаа Ж.Ганбаатарт гаргасан нь ийн маргалдахад хүргэжээ.

У.Хүрэлсүх: -Чинзориг сайд Ганбаатар хоёр УИХ-ын чуулганы хуралдаанд жижиг, дунд үйлдвэртэй холбоотой асуудлаар маргалдсанаас хамаг хэрэг үүслээ.

Ж.Ганбаатар: -Би чуулганы танхимд хүнтэй хэрэлдээгүй.

У.Хүрэлсүх: -Намын дарга чинь үг хэлж байна. Чи дуугүй сонсож сур.

Ж.Ганбаатар: -Би худал зүйл сонсохгүй.

У.Хүрэлсүх: -Чи дүүргийн намын хорооны дарга. Танай дүүргийн намын хорооны гишүүн чиний өөдөөс ингэж хэдэрлээд байвал яах вэ. Чи хүний үгийг сонсож сур.

Ж.Ганбаатар: -Би чуулганы танхимд хэрэлдээгүй гэдгээ танд хэлж байна.

У.Хүрэлсүх: -Чи анх удаа Их хуралд сонгогдож орж ирчихээд их пээдэлзээд байгаа. Намайг УИХ-ын гишүүн байгаагүй гэж бодоо юу. Би хэд хэдэн удаа УИХ-д сонгогдож наад танхимд чинь сууж байсан юм. Чам шиг бацаан ингэж пээдэлзэх болоогүй гэхчлэн “азаргалсан” байх юм.

Чингэж "азаргалснаас" гадна Ерөнхий сайд маань хачин жигтэй, гүн утгатай үг хэлэх болжээ. Хамгийн сүүлд буюу өчигдөр намын бүлгийн хурал дээрээ "Зүрхэндээ сорвитой байснаас нүүрэндээ сорвитой байсан нь дээр" гэж Б.Батзориг сайдад хандан хэлсэн нь намын бүлгийн гишүүдэд оньсого таавар шиг санагдан, одоо болтол ямар утга агуулж байгааг хэлэлцэж байгаа аж. 

Ерөнхий сайдын намын гишүүддээ “пээдэлзэх” бүрт намын гишүүд нь хүндэтгэлгүй хандаж байгаа нь дээрх хоёр тохиолдлоос харагдаж байх юм. Намын гишүүд болон улс орныг зангаргаар удирддаг болохоос зангаар удирдахгүй. Төрийн өндөр албан тушаал хүнийг эвдэж болох боловч хүнийг дуугүй зогсоож байгаад цэргийн ёсоор загнахад дуртай хүн олонгүй байх болов уу. Ерөнхий сайдын ааш авирын талаар намын гишүүд нь өөр зуураа ярьж байгаа ч зүрхлэн хэлж чадахгүй байна. Сэтгүүлчид хэлэхгүй бол өөр хэлэх хүнгүй болжээ.     

---