Кино үзвэрийн салбарт коронавирусийн цар тахлын үзүүлж буй үр нөлөөний улмаас дэлхийн хоёр дахь том кино театрын сүлжээ болох "Cineworld" АНУ болон Их Британийн салбаруудаа энэ долоо хоногт хаахаар болжээ.

Тус сүлжээ кино театрын АНУ дахь 536 салбар болон Их Британи дахь 127 салбар бүгд энэ сарын 8-ны өдөр хаалгаа барих бөгөөд эргээд хэзээ нээгдэх нь тодорхойгүй байна. Үүний үр дүнд нийт 45 мянган ажилчин ажилгүй болох юм. 

Ирэх сард үзэгчдэд хүрэх байсан Жеймс Бондын шинэ киноны нээлт цуцлагдан, өөр томоохон бүтээл ойрын үед том дэлгэц дээр гарах төлөвгүй байгаагийн улмаас "Cineworld" үйл ажиллагаагаа бүрэн зогсоохоос өөр сонголтгүй болжээ.

"Cineworld"-ын Гүйцэтгэх захирал Муки Грайдингер энэ талаар "Хөрвөх чадварын үүднээс харахад бид нээлттэй байх үедээ хаалттай байснаас хамаагүй их хэмжээний мөнгө алдаж байсан" гэсэн юм. Тэрээр мөн кино театруудынх нь үйл ажиллагаа нь хоёр сар эсвэл түүнээс урт хугацааны дараа дахин сэргэж магадгүй гэдгийг тэмдэглэсэн байна.

Цар тахлаас үүдэлтэй хөл хорио болон бусад хязгаарлалтад хамгийн их нэрвэгдсэн салбаруудын нэг бол үзвэр үйлчилгээ юм. Зарим кино студиүд энэ жил төлөвлөөд байсан томоохон кинонуудаа "Netflix", "Disney Plus" гэх мэт стрийминг платформ дээр гаргахыг сонгосон бол зарим киноныхоо нээлтийг 2021 он хүртэл хойшлуулаад байгаа билээ.

Эх сурвалж: Al Jazeera

---