Есөн настай охиныг хойд эцэгтээ удаа дараа зодуулж байхыг хөршүүд нь олонтаа харсан ч, нэг ч удаа цагдаа болон нийгмийн ажилтанд хандаж байгаагүй талаар TB5-д өгсөн яриа олон хүнийг нүдээ нээх хэрэгтэйг, хөршийн хяналт, иргэн хүний үүргээ ухамсарлахыг ойлгуулсан.

Энэ асуудлаар зарим иргэн “Хөршүүд хүчирхийллийн талаар мэдээлэл өгснөөр эрсдэлд учирдаг. Цагдаа дээр очиж мэдүүлэг өгдөг тийм хүн мэдээлсэн гээд хэлчихдэг. Дараа нь нөгөө хүчирхийлэгч нь агсам согтуу тавьж алуулчих гээд мэдээлсэн хүн нь хүчирхийлэлд өртдөг учраас хүчирхийллийг мэдээлдэггүй” гэж үзэж байгаа иргэд ч байна.

Гэр бүлийн хүчирхийллийн талаар заавал мэдээлэх үүрэг бүхий субъектүүд гэж хэн бэ? Хэрвээ мэдээлэх үүргээ биелүүлээгүй бол авагдах арга хэмжээний талаар?

 Гэр бүлийн хүчирхийлэлтэй тэмцэх тухай хуулийн 23 дугаар зүйлд:

• Бүх шатны боловсролын байгууллагын багш,
• Эмнэлгийн мэргэжилтэн,
• Нийгмийн ажилтан,
• Хүүхдэд үйлчилгээ үзүүлж байгаа байгууллага, ажилтан хүүхдийн эсрэг хүчирхийлэл, гэр бүлийн хүчирхийллийн талаар
• Цагдаагийн байгууллагад, цагдаагийн алба хаагчийн эзгүйд
• Сум, багийн Засаг даргад болон хүүхдэд яаралтай тусламж үзүүлэх /107, 108/ утасны үйлчилгээнд мэдээлэх үүрэгтэй” гэж заасан.

 Дээрх албан байгууллага, мэргэжилтнүүд Гэр бүлийн хүчирхийллийн талаар хуулиар хүлээсэн мэдээлэх үүргээ биелүүлээгүй бол Зөрчлийн тухай хуулиар хүнийг 200.000 төгрөгөөр торгоно.

Энэ төрлийн гэмт хэргийн  86.5 хувь  нь гэр, орон сууцанд буюу хаалттай хаалганы цаана үйлдэгдсэн байх тул иргэдийн зүгээс цагдаагийн байгууллагад энэ талаар мэдээлэл ирүүлэх нь гэр бүлийн хүчирхийллийн гэмт хэрэг, зөрчлийг илрүүлэхэд чухал ач холбогдолтой юм.

Гэвч энэ нь хэрэгжихгүй байна. Тухайлбал, тухайн байранд, гудамжинд, хажуу хөрш айлд нь гэр бүлийн хүчирхийлэл үйлдэгдэж байхад иргэд мэдээлэхгүй байна.

Гэр бүлийн хүчирхийлэл цоожтой хаалганы цаана үйлдэгдэнэ. Иргэн хөндлөнгөөс мэдээлэхгүй бол цагдаагийн байгууллага төдийлөн шууд илрүүлэх боломжгүй байдаг.

Гэр бүлийн нууцтай холбоотой. Гэр бүлийн гишүүдийн нандин харилцааг хөнддөг болохоор үүнийг мэдээллээр л илрүүлдэг. Гэр бүлийн хүчирхийллийн дуудлага мэдээллийн 90 хувьд нь хохирогч өөрөө цагдаагийн байгууллагад гомдол гаргадаг. Гомдол гаргахдаа өөрөө хохироод, зодуулаад, аргаа барсандаа мэдээлж байна гэсэн үг. Түүнээс хөндлөнгийн хөрш айл нь үүргээ биелүүлэхгүй байна.

Гэр бүлийн хүчирхийлэлтэй тэмцэх тухайн хуулийн /Шинэчилсэн найруулга/

• 23.6.Энэ хуулийн 23.1-д заасны дагуу мэдээлэл хүлээн авсан байгууллага, албан тушаалтан мэдээлэл өгсөн этгээдийн талаарх мэдээллийг нууцлах үүрэгтэй.
• 23.7.Холбогдох албан тушаалтан ажил үүргээ гүйцэтгэх явцдаа хохирогч, гэрч, мэдээлэл өгсөн этгээдийн талаарх мэдээллийг задруулахыг хориглоно.

Тэгэхээр иргэн та гэр бүлийн хүчирхийллийн талаарх дуудлага мэдээлэл өгснөөр таныг торгох юм уу эсвэл таны талаарх мэдээллийг задруулахгүй байх үүргийг цагдаагийн байгууллага хүлээдэг. Харин худал дуудлага өгсөн бол Зөрчлийн тухай хуульд зааснаар 50 мянган төгрөгөөр торгодог.

---