Нийтэлсэн:   О.Тэргэл

4 жилийн өмнө

БНСУ-ын Кёнги мужийн Шихынг хотын гар утасны дэлгүүрт 60-аад насны нэгэн эмэгтэй утасныхаа төлбөрийн талаар эзэнтэй нь маргалдаж байгаад дэлгүүрийг тэр чигээр нь шатаасан байна.

Тэрээр дэлгүүрт орж ирээд, утасны төлбөр нь өндөр гарч байна хэмээн уурлаж эхэлсэн аж. Ингээд удалгүй тэрээр цүнхэндээ байсан тосыг дэлгүүрийн шалаар асган, асаагуур бариад, дэлгүүрийн эзнийг сүрдүүлсэн байна. Энэ үед сандарсан эрэгтэй дэлгүүрээс гүйн гарсан бөгөөд тэднийг дэлгүүрийн гадна маргалдаж байх үеэр гэнэт оч үсрэн, гуравхан секундэд дэлгүүр тэр чигтээ галд автжээ.

Уг эмэгтэй болон дэлгүүрийн эзэн хоёул түлэгдэл авсан бөгөөд одоогоор эмнэлэгт хэвтэн эмчлүүлж байгаа аж. Галыг 20 орчим минутын дотор унтраасан боловч дэлгүүр шалнаасаа тааз хүрэл тэр чигээрээ шатан, доторх гар утаснууд нь эхнээсээ хайлсан байдалтай олджээ. 

Энэ талаар тус барилгын менежер Ким Хонг-Кван "Тэр эмэгтэй утасны төлбөр нь их гарч байна гэж хэлсэн юм билээ. Тэгээд цуцлаад өг гэхэд нь дэлгүүрийн эзэн өөр багц руу солиод өгье гээд, долоо хоног хүлээхийг хүссэн гэсэн. Гэтэл энэ эмэгтэй долоо хоног хүлээж чадахгүй гээд шууд л ийм зүйл хийсэн нь энэ" хэмээн ярив. 

Эмэгтэй тос бэлтгэн авчирсан байсан тул цагдаа нар түүнийг уг хэргийг урьдчилан төлөвлөн, зориуд үйлдсэн байж болзошгүй гэж үзэж байна. Энэ нь галдан шатаах гэмт хэрэг бөгөөд их хэмжээний хохирол учирсан тул тус эмэгтэйн эмчилгээ дуусмагц түүнийг баривчлах зөвшөөрөл авахаар албаныхан ажиллаж байна.

Эх сурвалж: YTN

Сурталчилгаа