Энэ долоо хоногийн эхээр далайн усанд сураггүй алга болсон БНСУ-ын албаны хүнийг БНАСАУ-ын тал буудаж хороосон хэрэг энэ долоо хоногийн эхээр гараад байсан билээ. Тэгвэл Умард Солонгосын удирдагч Ким Жон Ун энэ хэргийн талаар Өмнөд Солонгосын ард түмнээс уучлал гуйсан болохыг Хөх ордноос мэдэгдэв.

Умардаас Өмнөдийн зүг илгээсэн албан ёсны мэдэгдэлд Ким Жон Ун шинэ коронавирусийн цар тахлын үед тус дэм хүргэхийн оронд энэхүү "тааламжгүй" хэргийн улмаас Ерөнхийлөгч Мүн болон БНСУ-ын иргэдийн "урмыг хугалсан" явдалд ихэд харамсан, уучлал гуйж буйг дамжуулсан байсныг Хөх ордны Үндэсний аюулгүй байдлын дарга Со Хүн мэдээлсэн юм.

Хойд Солонгосын тал мөн энэ хэргийн талаар хийсэн шалгалтынхаа үр дүнг Өмнөд Солонгосын талд илгээжээ. Уг тайланд Хойд Солонгосын тэнгисийн өрнөд хилийг зөвшөөрөлгүй гаталсан "үл таних" эрэгтэй 80 орчим метрийн зайд хөвж буй материал дээр байсан бөгөөд аюулгүй байдлын шалгалтад тодорхой хариу өгөөгүй хэмээн тэмдэглэсэн байна.

Дараа нь Умардын цэргүүд түүн рүү ойртоод, сумгүй буугаар хоёр удаа хий буудан, анхааруулга өгөхөд эрэгтэй зугтахыг оролдсон гэнэ. Энэ үед цэргүүд далайн хилийн аюулгүй байдлын холбогдох дүрмийн дагуу 40-50 метрийн зайд гал нээн, 10 гаруй удаа буудсан байна. 

Гал нээсний дараа албаныхан түүний хөвж ирсэн хэрэгслийг шалгахад их хэмжээний цус олдсон хэдий ч эрэгтэйн цогцос олдоогүй гэжээ. Ингээд тэд уг хэрэгслийг COVID-19-ээс урьдчилан сэргийлэх улсын онцгой байдлын удирдамжийн дагуу шатаасан гэсэн байна.

Ким Жон Ун энэ талаар "Болох ёсгүй зүйл боллоо" гэж үзэж байгаа бөгөөд цаашид ийм төрлийн нөхцөл байдалд бага ч гэсэн алдаа эсвэл том үл ойлголцол үүсгэхгүйн тулд тэнгисийн хилийн аюулгүй байдлыг хангах үйл ажиллагааг бүхэлд нь бүртгэх системийг бий болгохыг цэргүүддээ даалгасан гэв. Тэрээр мөн хоёр Солонгосын хоорондох "итгэлцэл, хүндэтгэлийн харилцаа" задарч унахгүй байхын тулд ийм "харамсалтай" хэрэг дахин давтагдахаас урьдчилан сэргийлж, шаардлагатай арга хэмжээг авах хэрэгтэйг онцолсон байна.

Хойд Солонгосын удирдагч ийнхүү Өмнөд Солонгосоос албан ёсоор уучлал гуйх нь ер бусын үзэгдэл гэдгийг албаны хүмүүс тэмдэглэж байгаа юм. Тэгвэл Хөх ордон ч мөн ер бусын нүүдэл хийн, Умардын мэдэгдлийг бүрэн эхээр нь олон нийтэд дэлгэсэн байна.

Эх сурвалж: Yonhap News Agency

---