ОХУ-ын Ерөнхийлөгч Владимир Путиныг Нобелийн энх тайвны шагналд нэр дэвшүүлсэн болохыг түүний хэвлэлийн төлөөлөгч Дмитрий Песков өчигдөр буюу есдүгээр сарын 24-ний өдөр мэдэгджээ.

Гэвч Ерөнхийлөгч Путиныг Кремлээс нэр дэвшүүлээгүй гэдгийг Песков тэмдэглэсэн юм. Харин Оросын зохиолч Сергей Комков Путиныг нэр дэвшүүлэх өргөдлийг Нобелийн хороонд есдүгээр сарын 10-нд илгээсэн аж. Тэрээр "Нобелийн хороонд өргөдлөө өгснөөс хойших процесс аль хэдийн эхэлсэн байна! Түүнийг хэн ч зогсоож чадахгүй" хэмээн өөрийн фейсбүүк хуудаснаа бичсэн байна.

Сергей Комков ОХУ-ын Ерөнхийлөгчийг коронавирусийн эсрэг тэмцлийн хүрээнд нийт 27 оронд хүмүүнлэгийн тусламж үзүүлж, мөн тус улсын Үндсэн хуульд Бурханы тухай нэмэлт өөрчлөлт оруулсныг нь үнэлэн, түүнд Нобелийн энх тайвны шагнал гардуулахыг хүсэж байгаа аж.

Өмнө нь 2013 онд ч бас Комков Путиныг Сирийн асуудалд оруулсан хувь нэмрийг нь онцлон, тус шагналд нэр дэвшүүлэх өргөдөл гаргаж байжээ. Гэвч тэр үед Нобелийн хорооноос уг хүслийг хүлээж аваагүй байна.

Тэгвэл өнгөрсөн долоо хоногт Оросын их дээд сургуулийн хэсэг бүлэг багш нар Путины Засгийн газрыг шүүмжлэгч, сөрөг хүчний удирдагч Алексей Навальныйг Нобелийн энх тайвны шагналд нэр дэвшүүлсэн юм. Мөн АНУ-ын Ерөнхийлөгч Дональд Трамп Израйль болон Арабын нэгдсэн Эмиратын хооронд энхийн гэрээ хэлэлцээр байгуулахад зуучилсан гавьяаныхаа төлөө нэр дэвшээд байгаа билээ.

Эх сурвалж: Известия, New York Post

---