"Халуун сэдэв" ярилцлагын энэ удаагийн зочноор НИТХ-ын АН-ын бүлгийн ахлах мэргэжилтэн Ж.Энхбат уригдан оролцлоо. 

-2016-2020 оны хугацаанд юу Нийслэлийн МАН юу, хийж бүтээсэн гэж та нар дүгнэж байна вэ?

-2016-2020 онд Улаанбаатар хотыг аз жаргалтай хот болгохоор амласан. Сая дөрвөн жилийн хугацаанд "Аз жаргалтай Улаанбаатар" төсөл хөтөлбөр 94 хувийн гүйцэтгэлтэй "маш амжилттай" хэрэгжиж дууслаа.

-Та байнга эсэргүүцлийн тэмцэл өрнүүлж байгаа харагддаг. Энэ бүх үйл ажиллагааны зорилго нь гэх үү юу вэ?

-Мэдээлэлд ойрхон ажилладаг хүний хувьд иргэддээ үнэн зөв мэдээлэл өгөхийн тулд нийгэмд хандаж, үзэл бодлоо чөлөөтэй илэрхийлдэг. Улаанбаатар хотод олон улсын жишигт нийцсэн унадаг дугуйн зам нээлээ гэж дарга нар ярьсан. Тухай дугуйн зам дээр очиж үзэхэд явган хүний замын талыг улаан өнгөөр будаж байсан. Гэтэл дэлхийн стандарт зөөлөвчтэй байх ёстой, тэмдэг тэмдэглэгээтэй, өргөн зам барих ёстой. Тиймээс энэ асуудлыг олон нийтэд хүргэх ёстой. Яагаад гэвэл та бидний татварын мөнгө шүү дээ.

Хүүхдийн 100, Шөнийн гудамжийн замыг шатрын хөлөг шиг хар цагаанаар будсан. Хоёр хоногийн дараа бороо орж будсан зам нь урсаад алга болсон. Энэ мэтчилэн асуудлууд байдаг учраас иргэн хүний хувьд, иргэдийн хурлын төлөөлөгчийн хувьд хяналт тавьж ил тод байдлыг хангахаар ажилладаг.

-Энэ мэтээр өнгөрсөн хугацаанд хичнээн асуудлыг олон нийтэд хүргэсэн бэ?

-Иргэдийн хурлын бүлэгт ажиллах хугацаандаа Улаанбаатар хотын төсөл санхүүтэй холбоотой 11 асуудлыг хөндөж гурвыг нь нягталж шалгуулсан байдаг.

Монгол Улсын Ерөнхий сайдад Нийслэлийн засаг даргын гурван орлогч ёс зүйгүй, танхай, хувийн ашиг сонирхолтой байсан учир ажлаа өгөхийг шаардсан. Нэг орлогч нь бааранд хүн зодож, пивоны шилийг цээжинд нь зоосон байдаг. Нөгөө орлогч авлигын асуудлаар шалгагдаж, өөртөө ашигтай байдлаар ажилладаг. Тэгсэн хэрнээ ахиж нэр дэвших гээд байж байна.

Улаанбаатар хотын авто замын түгжрэлийг багасгах зорилгоор ямар ч тооцоололгүй зүүн эргэхийг зогсоосон.  Хоногийн хугацаанд зүүн эргэхийг хориглоход 956 сая төгрөг зарцуулчихаад буцаагаад цуцалчихсан. Тэгээд энэ асуудал дээр хэн ч хариуцлага хүлээхгүй. Ингээд л 956 сая төгрөг салхинд хийсч байгаа юм.

---