АНУ-ын "Great Smoky Mountains" үндэсний цэцэрлэгт хүрээлэнгийн үүдэнд хэн нэгэн этгээд арьс өнгөөр ялгаварлан гадуурхах үзлийг эсэргүүцсэн "Black lives matter" хөдөлгөөний нэрийг өөрчлөн, "Black lives don't matter" гэсэн тэмдгийг байрлуулсан байсныг тус хүрээлэнгийн алба хаагчид илрүүлсэн байна.

Одоогоор тогтоогдоогүй байгаа этгээд цэцэрлэгт хүрээлэнгийн нэвтрэх хэсгийн самбар дээр хар баавгайн арьс тохоод, "Эндээс нуур хүртэл өнгөт арьст хүмүүсийн амь чухал биш" гэсэн бичигтэй цаасан тэмдэг байрлуулсан байжээ. Уг тэмдгийг өнгөрөгч бямба гарагт хэсэг жуулчид олж хараад хүрээлэнгийн ажилчдад мэдэгдсэн байна. Хэрэгтэн уг тэмдгийг есдүгээр сарын 18-19-ний хооронд байрлуулсан гэж албаныхан үзэж байгаа юм.

Хэргийг хариуцаж буй ахлах байгаль хамгаалагч Лиза Хенди "Бид энэ хэргийн болзошгүй сэдэл, зорилгыг судалж байгаа бөгөөд энэ талаар мэдээлэлтэй хэн ч хамаагүй бидэнтэй холбоо барихыг уриалж байна" хэмээн албан ёсны мэдэгдэлдээ тэмдэглэжээ. Мөрдөн байцаагчид хэргийн эзнийг тогтоох, баривчлах, ял шийтгэлд хүргэх мэдээллийг хуваалцсан иргэнд таван мянга хүртэлх ам.долларын шанал санал болгож байгаа аж.

Лиза Хенди мөн уг хэргийг "Үнэхээр жигшмээр" гээд, "Үүний улмаас л бид аливаа мэдээлэлд шагнал өгөхөөр болсон" гэжээ.

Теннесси ба Хойд Каролина мужийн хооронд оршдог "Great Smoky Mountains" үндэсний цэцэрлэгт хүрээлэн нь Америкийн хамгийн их зочин хүлээн авдаг үндэсний цэцэрлэгт хүрээлэн юм.

Эх сурвалж: CNN

---