Одоогоос нэг жилийн өмнө Иргэний хөдөлгөөний тэмцэгч Б.Болороогийн нөхөр “Хишиг Арвин Индустриад” ХХК-д ажиллаж байхдаа лифтний хонгилд унаж нас барсан байдаг. Тухайн үеийн шүүх эмнэлэгийн дүгнэлтээр түүний нөхрийг ажлын байрандаа архидан согтуурч, ослын улмаас нас барсан хэмээн үзсэн.

Харин Б.Болороо энэ шийдвэрийг эсэргүүцэж Б.Болороо нөхрийнхөө нэр төрийг сэргээлгэхээр бүх шатны байгууллагад хандаж, суулт хийн тэмцсэн. Тэрээр өчигдөр буюу 2020 оны есдүгээр сарын 17-нд шүүх хуралдаа оролцож ялалт байгуулжээ.

Энэ талаараа Б.Болороо өөрийн цахим хуудсанд:

"Ханийнхаа нэрийг жинхэнэ утгаараа цэвэрлэж чадлаа. Хамгийн гол нь “Хишиг Арвин Индустриал” ХХК-ны захирал Б.Хишигдорж гэм буруугаа хүлээн зөвшөөрч, ямар ч маргах зүйлгүй байсан учир шүүх хурал хурдан болж өнгөрлөө" хэмээжээ.

Улмаар тэрээр Цор ганц, үнэн хайраа надад зориулсан ханийхаа төлөө, үлдэж буй хайрын үргэлжлэлийнхээ төлөө шүүх дээр ялж, жинхэнэ утгаараа ханийхаа нэрийг цэвэрлэж, сүнсий нь амрааж чадлаа.

Бүтэн жил 3 сарын турш ханийнхаа амь насаа алдсан хэргийг үнэн зөвөөр шийдүүлэхийн төлөө явлаа. Энэ хугацаанд хичнээн шөнийг нойргүй хонож, хичнээн өдрийг сэтгэл түгшин, хичнээн хормыг шаналж өнгөрүүлснийг ээжээс минь өөр хүн мэдэхгүй, маш их тэвчиж, тэссэний үр дүнд өнөөдөр хэргийнхээ ард гарлаа.

Би анх лайв хийж тусламж хүсэхдээ ч, хэвлэлийн бага хурал хийхдээ ч, талбай дээр суулт хийхдээ ч, цензүргүй яриагаар орохдоо ч “хэн нэгний мууг үзэж, ял эдлүүлэх нь гол нь биш харин зөвхөн нөхрийнхөө нэр төрийг цэвэрлэнэ” гэсээр өнөөдрийг хүрсэн. Миний байр суурь хэзээ ч ганхаагүй ээ, тиймдээ ч миний нөхөрт хүн гарга гэж түлхүүр өгч явуулсан Мядагийг, ажил үүргээс гадуур ажил хийж байхад нь хяналт тавиагүй ХАБ хариуцсан хүнийг, камерын инженерийг нь яллагдагчаар татуулах байсан ч хүний мууг үзэхгүй гэсэндээ ингэж явсангүй ээ. Нөгөөтэйгүүр би өөрөө хайртай хүнээ санаж шаналах, ганцаардахын зовлонг амсаж яваа, охин маань эцгийн хайр халамжаар дутаж яваа учир өөр хэн нэгнийг ийм зовлонг бүү амсаасай гэж чин сэтгэлээсээ хүсэж байна...гэх мэтээр бичжээ. 

 

 

---