Сонгинохайрхан дүүргийн 153-р дунд сургууль болон 287-р цэцэрлэг өнөөдөр ажилласангүй. Учир нь тус цогцолборыг барьсан "Сүмт-Өргөө" ХХК нь өнөөдөр өглөө цогцолборыг битүүмжлэн түгжиж, "Бүтээн байгуулалтын 14 тэрбум төгрөгийг Сангийн яам өгөөгүй учир тодорхойгүй хугацаагаар хаалаа" гэсэн бичгийг хаджээ. Энэхүү хууль бус ажиллагааг дүүргийн цагдаагийн газраас хүчээр чөлөөлж байгааг та бүхэнд шууд дамжуулан үзүүлж байна. 

"Сүмт-Өргөө" ХХК нь тус цогцолборыг өөрийн хөрөнгөөр барьж байгуулсан ч одоо болтол нэг ч төгрөгийн санхүүжилтийг Сангийн яамнаас авч чадахгүй байгаа юм байна. Иймд "Сангийн яамны Төсвийн хөрөнгө оруулалтын газрын Г.Түвдэндорж 9911 2910 барилгын санхүүжилтийг өгөхгүй байгаа тул тодорхойгүй хугацаагаар битүүмжилж байгаа"-гаа мэдэгджээ. 

Энэ талаар Сонгинохайрхан дүүргийн Засаг дарга Ж.Сандагсүрэн "Тэмцлийн олон хэлбэр байдаг. Үр хүүхдийн хичээл сургуулийг хааж тэмцэж болохгүй. Иймд тус компанийн захирлыг хуулийн байгууллагад өгнө. Тэр мөнгө төгрөгийн асуудлаа тэмцлийн өөр олон хэлбэрээр нэхэж авч болох байсан. Ийм үйлдлийг өөгшүүлэхгүй" гэв. 

---