Конго улсын зүүн өмнөд Киву мужийн Камитуга хотын ойролцоо орших гурван алтны бичил уурхай хөрсний гулсалтын улмаас нурж, 50 гаруй хүн нас барсан гэж албаныхан мэдээлэв. Олон хоног үргэлжилсэн хүчтэй аадар бороо энэхүү золгүй явдалд хүргэжээ.

"Газар ухаж, чулуу зөөж байсан хүмүүсийг их хэмжээний усны урсгалд өртөн, живсэн. Мотор насостой аврах баг хохирогчдын цогцсыг гаргаж авахаар ажилласан" гэж Камитуга хотын захирагч Александр Бундя хэлсэн байна. Уг ослоос амьд гарсан иргэн Дива Хоноре тус бүр 50 орчим метр гүнтэй гурван уурхайд 50 гаруй хүн байсан хэмээн мэдээлсэн юм.

Ослын газар орон нутгийн олон зуун хүмүүс цугларан, аврах ажиллагааг ажиглан, туслалцаа үзүүлж байжээ. Амиа алдсан хүмүүсийн ихэнх нь залуучууд байсан гэдгийг Киву мужийн захирагч Тео Нгвабидже Каси онцлоод, талийгаачдын гэр бүлд гүн эмгэнэл илэрхийлсэн юм.

Конго улсын зүүн хэсэг болон Касай бүс нутагт бичил уурхайд гар аргаар олборлох ажил ихэвчлэн өндөр аюултай байдаг. Түүнчлэн эмэгтэйчүүд, хүүхдүүд эдгээр уурхайд ажиллан, амьдралаа залгуулах нь элбэг. Энэ оны эхээр тус улсын Маниема болон Катанга бүс нутагт нуралт болж, дор хаяж 18 хүн амь үрэгдсэн байна.

Эх сурвалж: Associated Press

---