Нийтэлсэн:   С.БУДРАГЧАА

4 жилийн өмнө

Иргэн Г.Гангамөрөн өөрийн фэйсбүүк хуудсаараа дамжуулан түгжрэл дунд хоол хийж, ногоо арилгаж, ажлаа хийж байгаа зурагтай пост оруулсан нь өнөөдөр хүмүүсийн анхаарлын төвд байлаа. Тэгвэл ямар учраас ийм пост оруулсан талаар түүнээс тодрууллаа.

-Тэрхүү зурагтай постыг оруулах болсон зорилго нь юу байсан юм бэ?

Иргэн Г.Гангамөрөн: 

-Улаанбаатар хот маань 1.5 сая хүн амтай, автомашины тоо 700 мянган орчим байна. Тэгэхээр талаас илүү хувь нь автомашинтай зорчиж байна. Гэтэл Улаанбаатар хотын ерөнхий төлөвлөгөө 1975 оныхоороо байгаад байдаг. Хүн ам, автомашины тоо өсөөд байдаг. Нөгөө авто зам маань ачааллаа даахаа байж, түгжрэл үүсэж байгаа юм.

Түгжрэл дунд айл өрхийн эзэгтэй нар хамгийн их цаг заваа өнгөрүүлж байна. Мэдээж эрэгтэй хүмүүс байгаа ч миний хувьд Улаанбаатар хотод тулгамдаж байгаа олон асуудлуудыг фото хэлбэрээр өөрийн хувийн фэйсбүүктээ харуулсан юм. Үүний өмнө нь ус зайлуулах хоолойн асуудлаар оруулж, шийдлээ хэлчихсэн байсан.

-Таны хувьд автомашин дотроо лууван арилгаж байгаа. Мөн асаагаагүй газан плитка дээр сав тавьчихсан хоол хийж байгаа. Ажлаа хийж байгаа зурагны дор эмэгтэйчүүд тань руу буруутгасан шинжтэй дайрсан байсан. Эмэгтэйчүүдийг муухай харуулахыг зориогүй биз дээ.

Энэхүү постоороо эмэгтэйчүүдийг харлуулах биш, харин ч эмэгтэй хүн ямар их ачааллыг өөр дээрээ авдаг талаар өгүүлэхийг хүссэн. Ер нь бол би ч өөрөө гэрлэн дохио дээр зогсох үеэр нүүрээ буддаг. Энэ түгжрэлд дунд нийт хүн маань үр бүтээлтэй өнгөрүүлэх цагаараа хохирч байгаа нь тэр хүний буруу биш. Асуудал нь төлөвлөлт, хүн амын өсөлт, автомашины тоо зэрэг нөлөөлж байгаа.

Яг үнэндээ автомашин дотроо хоол хийж байгаа зурагт постын агуулга нь эмэгтэй хүн гэртээ хоолоо хийж идээд дуусгамаар хугацааг яг гэртээ харих замдаа өнгөрөөж байна. Түгжрэлгүй гэртээ очдог байсан бол нэг цаг 30 минутад ямар ч гоё хоол хийж болно.

Гэтэл эмэгтэйчүүд түгжрээд гэртээ очсоны дараа ар гэрийнхэн нь яагаад хоолоо хийгээгүй юм бэ хэмээж болохгүй шүү гэж эмэгтэйчүүдийнхээ талд орж пост оруулсан.

Олон судалгаа мэдээллийн дунджийг ашиглан постынхоо тоо мэдээлэлд ашигласан. Миний хувьд анхны мэргэжил маань сэтгүүлч тул эхний эх сурвалжаас илүү дахин өөр эх сурвалжаас лавлаж нэгтгэдэг.

Энэ постоороо хамгийн гол нь асуудлыг шүүмжлэхгүйгээр, бухимдахгүйгээр гэхдээ статистиктай цаашлаад ямар шийдэл байгааг хамтаараа хэлэлцэж, дэмжиж болохуйцыг нь нийлээд шийдвэр гаргах түвшинд хүргэе гэсэн зорилготой.

-Таны хувьд автозамын түгжрэлийг бууруулахын тулд ямар шийдэл байх ёстой гэж харж байна вэ?

Улаанбаатар хотын авто замын түгжрэлийг бууруулахын тулд нийтийн тээврийг хөгжүүлэх ёстой. Дээрээс нь явган хүний болон дугуйн зам талбайг сайжруулах. Олон улсын судалгаагаар нийтийн тээврийг сайжруулж, хөгжүүлж байж авто замын түгжрэлийг бууруулах боломжтой гэж дүгнэсэн байдаг.

Сурталчилгаа