Эрүүл мэндийн яамны /2020-08-18/ 11 цагийн ээлжит хэвлэлийн бага хурал эхэллээ.

ХӨСҮТ-ийн Тандалт, судалгааны албаны дарга А.Амбасэлмаа "ХӨСҮТ, Дархан-Уул аймгийн салбар лабораториудад наймдугаар сарын 17-нд нийтдээ 586 хүнд коронавирусийн шинжилгээ хийхэд бүх сорьц “Сөрөг” гарч коронавирус илрээгүй. Үүнд:

• Долдугаар сарын 28-нд Сөүл-Улаанбаатарын нислэгээр ирсэн 258 хүний давтан шинжилгээ,
• Наймдугаар сарын 11-нд Прага-Улаанбаатарын онгоцоор ирсэн 248 хүний давтан шинжилгээ,
• ХӨСҮТ-д тусгаарлагдсан гурван хүний шинжилгээ,
• Тандалтын зорилгоор улсын нэгдүгээр төв эмнэлгээс ирсэн нэг хүний шинжилгээ,
• Сувиллын ажиглалтад байгаа гурван хүний шинжилгээ,
• Тусгаарлан ажиглах байранд тусгаарлагдсан 28 хүний шинжилгээ,
• Цэргийн төв эмнэлэгт тусгаарлагдсан 13 хүний давтан шинжилгээ,
• Алтанбулагийн боомтоор орж ирсэн ачаа тээврийн 28 жолоочийн шинжилгээ,
• Сэлэнгэ аймагт тусгаарлагдсан нэг хүний шинжилгээнд тус тус коронавирус илрээгүй байна.

ХӨСҮТ-өөс өнөөдөр хоёр хүн эдгэрч, дараагийн сувилал руу шилжлээ. 27,28 настай, энхийг сахиулагчид байна.

Монгол улсад зөөвөрлөгдөн орж ирж батлагдсан тохиолдол 298, эдгэрсэн 278 иргэн байна. Эдгэрсэн хүмүүсээс сувиллын ажиглалтад 49 хүн, гэрийн ажиглалтад 14 хүн байгаа бол ажиглалт, тандалтын хугацаа дууссан 215 хүн байна.

Одоогоор ХӨСҮТ-д 20 хүн эмчлэгдэж байгаа бөгөөд 18 хүний биеийн байдал хөнгөн, хоёр хүнийх хүндэвтэр байна. ХӨСҮТ-д нийтдээ 41 хүн ажиглалт, тандалт эмчилгээнд байгаа.

Өнөөдөр өглөө 11 цагт ХӨСҮТ-д тусгаарлагдаж байсан жирэмсэн эмэгтэй амаржлаа"гэв.

---