Эрүүл мэндийн яамны /2020-08-13/ 11 цагийн ээлжит хэвлэлийн бага хурал эхэллээ. Монгол улсад коронавирусийн 297 тохиолдол бүртгэгдээд байгаа билээ.

ХӨСҮТ-ийн Тандалт, судалгааны албаны дарга А.Амбасэлмаа "ХӨСҮТ, ЗӨСҮТ, Дархан-Уул аймгийн салбар лабораториудад наймдугаар сарын 12-нд нийтдээ 487 хүнд коронавирусийн шинжилгээ хийхэд 483 сорьц “Сөрөг” гарч коронавирус илрээгүй. Харин дөрвөн хүний шинжилгээнд коронавирус илэрлээ. Наймдугаар сарын 11-нд Прага-Улаанбаатарын онгоцоор ирсэн 73 настай эмэгтэй, 20 настай эмэгтэй, мөн Алтанбулагийн боомтоор 280 гаруй хүнийг татан оруулсан тэдгээрээс Орхон аймагт тусгаарлагдсан 24 настай эрэгтэй, Дархан-Уул аймагт тусгаарлагдсан 65 настай эмэгтэй ОХУ-ын иргэнээс коронавирус илэрсэн байна.

Бусад шинжилгээнд коронавирус илрээгүй. Үүнд:

• Долдугаар сарын 29-нд Сөүл-Улаанбаатарын онгоцоор ирсэн 165 хүний давтан шинжилгээ,
• Долдугаар сарын 30-нд Сидней-Улаанбаатарын онгоцоор ирсэн 165 хүний давтан шинжилгээ,
• Тусгаарлах байранд байгаа 23 хүний давтан шинжилгээ,
• Тандалтын зорилгоор цуглуулсан найман хүний шинжилгээ,
• Замын-Үүдэд тусгаарлагдсан дөрвөн хүний давтан шинжилгээ,
• Дархан-Уул аймгийн нэгдсэн эмнэлэгт тусгаарлагдсан хоёр хүний давтан шинжилгээ,
• Алтанбулагийн боомтоор орж ирсэн ачаа тээврийн 16 жолоочийн шинжилгээнд тус тус коронавирус илрээгүй байна.

Монгол улсад зөөвөрлөгдөн орж ирж батлагдсан тохиолдол 297, эдгэрсэн 269, эмчлэгдэж буй 28 иргэн байна” гэв.

---