Эрүүл мэндийн яамны /2020-08-12/11 цагийн ээлжит хэвлэлийн бага хурал эхэллээ. Монгол улсад коронавирусийн 293 тохиолдол бүртгэгдээд байгаа билээ.

ХӨСҮТ-ийн Тандалт, судалгааны албаны дарга А.Амбасэлмаа "ХӨСҮТ, Дархан-Уул аймгийн салбар лабораториудад наймдугаар сарын 11-нд нийтдээ 677 хүнд коронавирусийн шинжилгээ хийхэд бүх сорьц “Сөрөг” гарч коронавирус илрээгүй. Үүнд,

• Наймдугаар сарын 11-нд Прага-Улаанбаатарын онгоцоор ирсэн 271 хүний шинжилгээ,
• Долдугаар сарын 28-нд Сөүл-Улаанбаатарын онгоцоор ирсэн 264 хүний давтан шинжилгээ,
• Ажиглах байранд ажиллаж байгаа эмч, эмнэлгийн ажилчдын шинжилгээ,
• Тандалтын зорилгоор цуглуулсан найман хүний шинжилгээ,
• Замын-Үүдэд тусгаарлагдсан зургаан хүний давтан шинжилгээ,
• Дархан-Уул аймгийн нэгдсэн эмнэлэгт тусгаарлагдсан хоёр хүний давтан шинжилгээ,
• Алтанбулагийн боомтоор орж ирсэн ачаа тээврийн 21 жолоочийн шинжилгээ,
• Орхон аймагт тусгаарлагдсан нийт 71 хүний шинжилгээ,
• Баруун хараа хотод тусгаарлагдсан 23 хүний шинжилгээ
• Сэлэнгэ аймагт тусгаарлагдсан нэг хүний шинжилгээнд тус тус коронавирус илрээгүй байна.

ХӨСҮТ-өөс өнөөдөр зургаан хүн эдгэрч дараагийн шатны сувилал руу шилжлээ. Эдгэрч гарсан иргэд энхийг сахиулагчид мөн долдугаар сарын 29-ний Истанбулын онгоцоор ирсэн иргэд байна.
Монгол улсад батлагдсан тохиолдол 293, эдгэрсэн 269, эмчлэгдэж буй 24 иргэн байна. Эдгэрсэн иргэдийн 50 нь сувилалд, 26 нь гэрт, 193 хүний ажиглалт, тандалтын хугацаа дууссан байна.

ХӨСҮТ-д нийт 43 хүн эмчлэгдэж тусгаарлагдаж буй бөгөөд тусгаарлалтад байгаа нэг хүний биеийн байдал маш хүнд байна” гэв.

---