Батлагдаад удаагүй байгаа Хонконг дахь аюулгүй байдлын шинэ хуулийн хүрээнд Хонконгийн цагдаа нар анхны дайчлан баривчлах ажиллагаагаа явуулж, цахим сүлжээнд үзэл бодлоо чөлөөтэй илэрхийлсэн дөрвөн оюутныг салан тусгаарлалтад турхирсан гэсэн зүйл ангиар баривчилжээ.

Тэдний дунд Хонконгийн бие даасан байдлыг дэмжигч залуусын хөдөлгөөний тэргүүн асан Тони Чун байгаа аж. Ихээхэн хэл ам дагуулж буй Хонконгийн аюулгүй байдлыг сахин хамгаалах шинэ хуулиар аливаа хорлон сүйтгэх, салан тусгаарлалтад уриалах, гадаадын хүчинтэй үгсэх зэрэг ажиллаагааг шууд гэмт хэрэгт тооцно гэж заасан юм.

Энэ сарын 1-ний өдрөөс эхлэн хэрэгжсэн шинэ хуулийн хүрээнд өмнө нь жагсаал цуглаанд уриа лоозон барьсан зэрэг шалтгаанаар хэд хэдэн хүнийг саатуулсан ч анхны тусгай ажиллагаа нь дээрх оюутнуудын хэрэг болж байна. Оюутнууд 16-21 насныхан агаад гурав нь эрэгтэй, нэг нь эмэгтэй аж.

Тусгай ажиллагааны үеэр тэдний компьютер, гар утас, бичиг баримтыг мөн хурааж авчээ. Баривчлагдсан оюутнууд “Studentlocalism” хэмээх залуусын бүлгэмийн гишүүд аж.

---