"Финансхолдинг" ХХК-ийн захирал, иргэн Б.Энхцэцэг махны экспорт болон тус салбарт бизнес эрхлэгчдэд хууль, журам тэгш үйлчилдэггүй, төрийн байгууллагуудад ажиллаж буй албан тушаалтнууд хувийн ашиг сонирхолдоо хөтлөгдөн, иргэн, аж ахуйн нэгжийг хохироож буй талаар мэдээлэл өглөө.

"Финансхолдинг" ХХК-ийн захирал, иргэн Б.Энхцэцэг: "2019 оноос мах экспортлох квот олдохоо больсон. Учир нь хятадууд мах ихээр авах болсон. Хятадад гахайны өвчин гарсны улмаас Монголоос мах авах эрэлт өссөн. Ингээд 2019 оноос одоог хүртэл надад махаа гаргах квот олдохгүй би үйлээ үзэж байна. Тэгээд надад квот өгөхгүй байгаа шалтгаанаа мэргэжлийн байгууллага нь тайлбарлахдаа "Таны мах экспортлох эрхгүй үйлдвэрт бэлтгэгдсэн мах. Тиймээс танд квот өгөхгүй" гэж хэлсэн. Гэтэл гадагшаа гарч байгаа бүх мах экспортлох эрхгүй үйлдвэрт махаа боловсруулж, экспортоор гаргадаг. Миний эргэн тойронд байгаа бүх хятадуудад хууль журам нь үйлчлэхгүй байгаад гомдолтой байна.

Монголд мах экспортлох эрх бүхий 27 ААН компани байдаг. Үүний долоо нь монгол, үлдсэн нь хятадын хөрөнгө оруулалттай компани байдаг. 

Экспортлох эрхтэй үйлдвэр гэхээр эрүүл ахуйн бүхий л стандарт шаардлага хангасан, мэргэжлийн байгууллагын шалгалтад тэнцсэн үйлдвэр байх ёстой. Эдгээр экспортлох эрхтэй компаниудад яам махны квотоо өгдөг. Гэтэл өнөөдөр эрхээрээ квотоо аваад байгаа ААН нь бүгд л үнэхээр мэргэжлийн байгууллагын шалгалтад тэнцсэн үйлдвэртэй юу? Яг юун дээр үндэслэж квот өгөөд байгаа юм гэдэг дээр маш том асуудал хөндөгдөж байна. Мэдээж экспортлох эрхтэй , шаардлага хангасан компани бий. Гэхдээ 27 компаниас гарын таван хуруунд ч хүрэхгүй гэдгийг би мэднэ. Би үүнд л хариулт авахыг хүсэж байна" гэв.

Монголд бүх квотыг хятадууд аваад байгаагаас болоод монголчуудын бизнесийн орчин хумигдаж байгаа олон шалтгаан бий. 

---