БНХАУ-ын эрдэмтэд коронавирусийн эсрэг вакцин, эмийг турших зорилгоор генийн өөрчлөлттэй, COVID-19 вируст урвал үзүүлдэг хулгануудыг гарган авчээ.

Уг төслийн хэрэгжүүлэгч “SinoGene” компанийн Гүйцэтгэх захирал Ми Жидонг “Генийн клоны аргаар эм, вакциныг турших боломжтой амьтдын загварыг гарган авдаг. Ердийн амьтад коронавируст тэсвэртэй тул клон болон геномын өөрчлөлтийн арга замаар амьтдад хүний ACE2 генийг шилжүүлэн суулгасан. Үүний үр дүнд туршилтад оролцож буй амьтад халдвар авах бөгөөд бид вакцин, эмийн үр нөлөөг шалгах боломжтой болно” гэсэн байна.

Судалгаагаар коронавирус ACE2 молекулаар дамжин хүний ​​биед нэвтэрдэг болох нь тогтоогдсон. Харин хулганын ACE2 уураг хүний ​ ACE2 уураг хоёр бүтцийн ялгаатай байдаг учир ердийн лабораторийн хулгануудыг коронавирусийн халдварын эсрэг эмчилгээний судалгаанд ашиглахад тохиромжгүй юм.

Дэлхийн хэмжээнд коронавирусийн халдварын байдал улам бүр доройтож байгаа энэ үед эм, вакцин боловсруулах ажил нэн тэргүүнд тавигдаж байна. БНХАУ болон дэлхийн бусад оронд вакцин гарган авах ажил идэвхтэй явагдаж байгаа бөгөөд ийм төрлийн судалгааны явцад амьтад дээр олон тооны туршилт хийх шаардлага гардаг. Одоогийн байдлаар Хятадын судалгааны нийгэмлэгт “hACE2”-тэй лабораторийн хулганууд ихээхэн эрэлт хэрэгцээтэй байгаа бөгөөд голчлон эрдэм шинжилгээ, боловсролын байгууллагууд болон биогенетик судалгааны компаниуд ашигладаг гэнэ.

Эх сурвалж: Риа Новости

---