Парисын алдарт Нотр Дамын сүм өнгөрсөн жилийн дөрөвдүгээр сард шатаж, сэргээн засварлах ажлыг таван жилийн хугацаанд багтаж дуусгахаа Францын Ерөнхийлөгч Эммануэль Макрон мэдэгдсэн билээ.

Сүмийн оройг хэрхэн засварлах, хэлбэр загварыг шинэчлэх талаар уран барилгачид олон шинэ санаа дэвшүүлсэн боловч Ерөнхийлөгч Макрон хуучний готик сүмийн хэв маягаар нь сэргээн засварлах болсныг мэдэгджээ. Өөрөөр хэлбэл 19 дүгээр зуунд сэргээн засварлахад бүрдүүлсэн хэв маягийг хуучнаар нь дахин бүтээн босгохоор болсон байна.

2024 онд Франц улс зуны Олимпийн наадмыг зохион байгуулахаар төлөвлөсөн. Тиймээс аялагч жуулчдын очих дуртай түүхэн дурсгалт газруудын нэг Нотр Дамын сүмийн засварын ажил тухайн жилд багтаж дуусах ёстой юм.  

Сүмийн орой дээврийг орчин үеийн загвартай болгоход олон улсын уран барилгачдын дунд уралдаан зарлах нь хэт их хугацаа шаардах тул Олимпийн наадмаас урьтаж сэргээн засварлаж амжихгүй байж болзошгүй гэж үзжээ. 13 дугаар зуунд баригдсан алдарт сүм шатсаны дараа олон улсын хандивлагчид 900 сая евро буюу тэрбум ам.долларыг сэргээн засварлахад хандивласан билээ.

Эх сурвалж: ВВС

---