Батлан хамгаалахын сайд, Бригадын генерал Г.Сайханбаяр Афганистанд энхийг сахиулахаар явсан зургаан цэрэг коронавирусийн халдвар авсан. Мөн дараагийн ээлжийн энхийг сахиулагчид гацсан зэрэг асуудлаас ажлаа эхлүүлнэ гэдгээ онцоллоо.

Батлан хамгаалахын сайд Г.Сайханбаяр: 

-Зэвсэгт хүчинд 31 дэх жилдээ ажиллаж байна. Зэвсэгт хүчний анги, салбар, ЗХЖШ-т арваад жил ажилласан. Сүүлийн арваад жил БХЯ-нд ажиллаж байна. БХЯ 2019-2020 онд эрх зүйн шинэчлэлийн хоёр дахь үе шатаа хийсэн. Өөрөөр хэлбэл, ирэх дөрвөн жилд хийх ажлын үндэс суурь нь бэлэн байгаа. Мөн, МАН-ын мөрийн хөтөлбөрийн биелэлт дээр гол анхаарлаа хандуулан ажиллана. 

Кабул хотод байгаа Монгол улсын Энхийн сахиулагчдын хүлээлгийн асуудал байгаа. Цэргийн албан хаагчид цар тахал авсан байдалтай, амаргүй байгаа. Ойрын үед татан авах ажиллагааг зохион байгуулна. 113 цэргийн албан хаагчаас зургаа нь халдвар аваад байна. 

-Генерал цолтой, салбарын хүн нь сайдаар томилогдсон анхны тохиолдол уу? 

-Тухайн үедээ Агаарын цэргийн командлагчаар ажиллаж байсан, хошууч генерал Ж.Гүррагчаа 2000-2004 онд Батлан хамгаалахын сайдаар ажиллаж байсан. Түүнээс хойших хоёр дахь сайд гэж хэлж болно. 

---