Итали улс дэлхийд тэргүүлэгч технологийн компаниудыг хэрэглэгчдийн хуучин гар утасны хэрэглээг хүчээр бууруулахыг оролдсонд буруутгаж тус бүр таван сая еврогоор торгосон байна.

Apple, Samsung брэндийн гар утаснуудын шинэчилсэн программ бүрэн хүчин чадлаараа ажиллаагүй гэж Италийн хэрэглэгчдийн эрх ашгийг хамгаалах газраас мэдээлжээ.

Ингэснээр зарим хэрэглэгчид хуучин гар утсаа сольж шинийг худалдаж авах хэрэгтэй болсон гэж үзсэн байна.

Түүнчлэн Apple хэрэглэгчдэд хуучин хэрэглэж байсан гар утасны зайг хэрхэн солих, ажиллуулах талаар бүрэн гүйцэд мэдээлэл өгөөгүй гэсэн хэргээр нэмж таван сая еврогоор торгуулжээ.   

Өнгөрсөн оны 12 дугаар сард Apple-ын гар утаснууд зайны асуудлаас болж ажиллахаа больсон байна.

Гэхдээ хэрэглэгчдэд шинэ гар утсаа зарах гэж ийм үйлдэл гаргаагүй гэж компанийн зүгээс мэдэгджээ.

Samsung корпораци торгуулсныхаа дараа “Италийн эрх баригчдын шийдвэрт сэтгэл дундуур байна. Бид програм хангамжийн шинэчилсэн хувилбарыг Galaxy Note 4 гар утсыг хэрэглээнээс хасах гэж ашиглаагүй. Бүх гар утсанд хэрэглэх боломжтойгоор програмаа хийдэг. Тиймээс Итали улсын тавьсан торгуулийн эсрэг давж заалдана” гэдгээ албан ёсоор мэдэгдсэн байна.

Эх сурвалж: www.cnet.com

---