Дуучин Кэти Перри сэтгэцийн эрүүл мэнд нь сайнгүй байсан талаар саяхан өгсөн ярилцлагадаа дурдаж ам нээжээ. Канадын радиогийн “Q and CBC” шоуны үеэр поп од 2017 онд жүжигчин Орландо Блүмээс салсны зэрэгцээ шинэхэн цомог нь борлуулалт муутай байсан тул сэтгэл санаагаар маш их унаж амиа егүүтгэмээр санагдаж байсан гэдгээ нуулгүй ярьсан байна.

“Би огт инээмсэглэхээ больсон байсан. Найз залуугаасаа салж, бичлэгүүд маань ч амжилттай болоогүй, нэг ёсондоо би сүйрсэн” хэмээн анхныхаа охиныг хүлээж байгаа 35 настай дуучин бүсгүй ярьжээ. Түүнийг амиа егүүтгэх талаар бодоход хүргэж байсан жүжигчин Орландо Блүм одоо сүйт залуу нь болсон бөгөөд тэд тун удахгүй үрийн зулай үнэрлэхээр хүлээж байгаа юм.

Кэти Перри буюу Кэтрин Хадсоны үргэлжлүүлэн ярьснаар сэтгэл санааны хүнд гутралаа даван туулахад түүнд талархах сэтгэл, итгэл найдвар тусалсан гэжээ. Ачлал өгөөмөр сэтгэлийг санаж, талархах ёстой гэдгээ ойлгосноор түүний туулсан хүнд хэцүү цаг туршлага болон үлдэж, амьдралыг өөрөөр харах өнцгөө олсон хэмээн ярьжээ. Мөн хэрэв энэ замыг олоогүй байсан бол уйтгар гунигт автан үгүй болох байсан хэмээн нэмж дурдсан байна.

Дуучин бүсгүй сэтгэцийн эрүүл мэндийн асуудалтай байснаа олон нийтэд ил тодоор зарласан анхны тохиолдол энэ биш юм. Тэрээр гурван жилийн өмнө сэтгэл санааны хүнд байдалд орсноо шүтэн бишрэгчидтэйгээ хуваалцаж байжээ.

Эх сурвалж: CNN

---