Авлига хээл хахууль, улс төрийн тогтворгүй байдал, олон арван жил үргэлжилсэн зэвсэгт мөргөлдөөн, дайны улмаас хэдийнээ сүйрсэн эрүүл мэндийн халамж үйлчилгээний тогтолцоо коронавирусийн тархалтын үед улам бүр дордож байна. Афганистан улсад коронавирусийн халдварын 30,000 гаруй батлагдсан тохиолдол бүртгэгдэж, 700 гаруй иргэн нас баржээ.

Ахмад Шахын эхнэрт коронавирусийн шинж тэмдэг илрэхэд Кабул дахь улсын эмнэлэгт аваачихаар болжээ. Гэвч эмнэлэгт хангалттай сул ор байхгүй, тусламж үйлчилгээ дутмаг тул эмч нар түүнд эхнэрээ гэртээ эмчлэхийг зөвлөсөн байна. Нэг нь хэрэв чих эхнэртээ хайртай л бол гэрлүүгээ аваад буц гэжээ. Шах гэртээ буцахаар болж хүчилтөрөгчийн нэмэлт, амны хаалт худалдаж авахад үнэ нь ойрын долоо хоногуудад хэд дахин өсч 200 ам.долларт хүрсэн байв. Зөвхөн үнэтэйгээс гадна тун ховор тул хаана, хэн эдгээрийг зарж байгааг олох нь бас нэгэн хүнд сорилт ажээ.

Дэлхийн эрүүл мэндийн байгууллагын Афганистан дахь төлөөлөгч доктор Рик Пийперкорны хэлснээр халдвартай иргэдийг оношлох, шинжлэх ажил маш муу хийгдэж байгаа нь тус улсын эрүүл мэндийн салбарт тулгарч буй бас нэгэн бэрхшээл юм. Оношилгоонд орсон иргэдийн тэн хагас нь халдвар тээгч гэдэг нь илэрсэн бөгөөд одоо мэдэгдэж байгаагаас ч олон халдвар авсан өвчтөнүүд бий гэж үзэж байна.

Мөн эмч, сувилагчид хаанаа ч хүрэхгүй байгаагаас шөнийн дотор хэдэн арван өвчтөн нэгэн зэрэг амьсгал хураасан явдал ч гарчээ. Үүгээр зогсохгүй эмч нарт зориулсан хамгаалалтын хувцас хэрэглэл үйлдвэрлэдэг компанитай гэрээ байгуулахын тулд 80,000 ам.долларын хахууль шаардсан хэрэг ч бүртгэгдсэн байна.

НҮБ эмнэлгийн ажилчдыг Талибаны зэвсэгт бүлэг удаа дараа хулгайлсан, эмнэлгийн тоног төхөөрөмж дээрэмдсэн зэрэг дотоодын зөрчил мөргөлдөөн хурцадсан талаар мэдээлжээ.

Эх сурвалж: ВВС

---