УИХ-ын 2020 ээлжит сонгуулийн үр дүнг хүлээн зөвшөөрч буйгаа улс төрийн зарим намууд илэрхийлж, сонгуулийн дүнгийн талаар өөрсдийн байр сууриа илэрхийллээ.

Эх орончдын нэгдсэн намын дарга Г.Ганбат:

Улс төрийн сонгуулийн тогтолцоо өнөөдрийн сонгуулийн үр дүнг тодорхой болгосон. Тиймээс бид "Сөрсөн 76" гэдэг нэгдэл байгуулж, сонгуульд оролцох уриалга гаргасан. Гэвч хэн ч хүлээж аваагүй. Одоо үр дүн нь тодорхой харагдаж байна. Нэгэнт үүссэн нөхцөл байдлыг хүлээн зөвшөөрөөд цаашаа яахаас өөр арга байхгүй.

Монголын консерватив намын дарга Н.Дашдаваа:

Бид улс төрийн шинэ соёлыг бий болгох ёстой. Тиймээс сонгуулийн үр дүнг хүлээн зөвшөөрч байна. Монголын ард түмний сонголтыг хүлээн зөвшөөрч байна. Угаасаа 3, 4-р сард гаргасан социологийн судалгаагаар МАН ялах нь тодорхой байсан. Гэтэл зарим улс төрийн намууд зохиомол хөөрөгдөл үүсгэж, баримтгүйгээр сонгуулийн үр дүнг будлиантуулах гэж оролдож байна. Ялангуяа МАХН-ын дарга Н.Энхбаяр монголын ард түмнийг талцуулах гэж оролдож байгаад харамсаж байна. Сонгуулиас цааш зөрчилдөөн байх ёсгүй. Нэг тийш харах ёстой.

Баянзүрх дүүргийн 23-р тойрогт бие даан нэр дэвшсэн Ө.Эрдэнэболд:

Сонгуулийн дүнд би анхандаа эргэлзэж байлаа. Гэхдээ одоо эргэлзээгээ тайлсан. Учир нь сонгуулийн дүнгийн хяналтын тооллогыг 100 гаруй хэсэг дээр явуулсан. Нэг ч дүн зөрөөгүй учир би хүлээн зөвшөөрөхөөс аргагүй болсон. У.Хүрэлсүхийн Засгийн газрыг ажлаа үргэлжлүүлээсэй гэж ард түмэн хүссэн. Одоо ажлыг нь хийлгэх ёстой.

---