Эрүүл мэндийн яамны 11 цагийн ээлжит хэвлэлийн бага хурал зохион байгуулагдлаа. ХӨСҮТ өчигдөр 171 хүнд коронавирусийн шинжилгээ хийхэд 168 нь "сөрөг", гурван хүний хариу "эерэг" гарчээ. 

Коронавирус нь дэлхийн 216 улсад бүртгэгдээд байна. Тус өвчнөөр есөн сая 679 мянган хүн өвчилж, 488 мянган хүн нас баржээ. Улмаар 8.2 сая хүн эдгэрч, 3.2 сая эмчлүүлж байна. Сүүлийн 24 цаг 150 мянган хүн шинээр өвчилж, 4000 гаруй хүн нас барсан байна.
Хөрш ОХУ-д өвчлөл 7113 шинэ тохиолдлоор нэмэгдэж 92 хүн нас баржээ. Манай олон аймагтай хил залгаа Буриад, Эрхүү, Туваа мужуудад өвчлөл өмнөх өдрийнхөөс 49-149 тохиолдлоор нэмэгдсэн байна.
Цэргийн төв эмнэлэгт 93 хүн тусгаарлагдаж байгаагаас архаг хууч өвчтэй 52, эрчимт эмчилгээнд зургаан хүн байна. Эдгээр иргэдэд 13 их эмч 42 сувилагч эмнэлэгийн тусламж үйлчилгээ үзүүлж байна.
Гэрийн тусгаарлалтад нийт 5002 хүн байснаас одоо 624 хүн гэрийн тусгаарлалтад байна.

ХӨСҮТ-ийн ерөнхий захирал Д.Нямхүү: 2020 оны 6-р сарын 25-нд ХӨСҮТ-өөс нийт 171 хүнд коронавирусийн шинжилгээ хийхэд 168 сорьц сөрөг гарч, коронавирус илрээгүй. Харин гурван хүнд вирус илэрлээ. Эдгээр нь Москва-УБ чиглэлийн үүргийн онгоцоор ирсэн 22-23 насны хоёр эрэгтэй, нэг эмэгтэй оюутнууд.

Мөн ХӨСҮТ-өөс дахин нэг хүн эдгэрч дараагийн сувилал руу шилжлээ. 19 настай оюутан 43 хоног эмчлэгдэн гарлаа.
Монгол улсад 219 тохиолдол албан ёсоор бүртгэгдсэнээс эдгэрсэн 170, эмчлэгдэж буй 49 иргэн байна. Биеийн байдлыг дурдвал хөнгөн 42 хүндэвтэр долоон иргэн байна.

---