Цар тахлын улмаас гуравдугаар сараас хойш үүд хаалгаа бариад байсан Испанийн Барселона хотын домогт “Gran Teatre del Liceu” дуурийн театр энэ долоо хоногт эргэн нээгдэхэд тэднийг танхим дүүрэн ногоон ургамлан үзэгчид угтан авав.

“UceLi” дөрвөл хамтлаг өнгөрөгч даваа гарагт Жакомо Пуччинигийн “Crisantemi” дуурийг тоглоход театрын 2,292 суудал тасалгааны ургамлаар дүүрэн байсан бөгөөд харин жинхэнэ үзэгчид нь тоглолтыг гэрээсээ онлайнаар  шууд дамжуулан үзэх боломжтой байжээ. Концертын найруулагч Евгенио Ампудиа хөл хорионы үеэр Испани болон дэлхий даяар юу тохиолдсоныг энэхүү дүр зургаар тусгахыг зорьжээ. Өмнө нь хүнээр дүүрэн байдаг байсан газрууд хоосорч, олон нийтийн орон зайг амьд байгаль эзлэх болсныг орон орны эх сурвалжууд мэдээлж байсан. Тэрээр уг тоглолтоор дамжуулан хүмүүс эргээд өдөр тутмын амьдралдаа орохдоо байгаль ертөнцтэй харьцах байдлаа дахин үнэлэсээсэй гэж найдаж байгаа аж.

Театрын удирдлагууд эдгээр хоёр мянга гаруй ургамлыг орон нутгийн үржүүлгийн газраас авсан бөгөөд тэднийг Барселонагын клиник эмнэлэг болон бусад эрүүл мэндийн мэргэжилтнүүдэд хандивлахаар төлөвлөжээ. Уг төслийг зохион байгуулагчид “Бидний үеийнхэнд урьд өмнө тулгарч байгаагүй тулалдаанд хамгийн хүнд хэцүү тэргүүн фронтод ажилласан эрүүл мэндийн тусламж үйлчилгээ үзүүлэгчдэд талархлаа илэрхийлэхийг хүссэн” гэв.

Испани улс өнгөрсөн долоо хоногийн ням гарагт орон даяарх онц байдлаа цуцлан, гурван сарын турш үргэлжилсэн хөл хорионд цэг тавьсан юм. “Gran Teatre del Liceu” театр ч мөн үе шаттайгаар хэвийн байдалдаа эргэн орохоо мэдэгдлээ.

Эх сурвалж: NPR, Lonely Planet

---