Танд үе үе сөрөг бодол орж ирэн, угийн гутранги хүн мэт санагддаг уу? Аливаа зүйл үргэлж ямар нэгэн байдлаар дутуу дулимаг санагддаг хүн бол энэ нь таны сэтгэл санаанаас гадна тархины үйл ажиллагаанд муу гэдгийг судалгаагаар нотолжээ.

Саяхан хийсэн шинэ судалгаагаар байнга сөрөг бодол төрж байвал энэ нь хожмын буюу өтөл насанд сөрөг үр дагавартай ажээ. Таны тархин дахь танин мэдэхүйн үйл явцыг буруулж, Алцгеймерийн өвчин үүсгэдэг хоёр төрлийн хортой уургийг бүрэлдүүлдэг байна.

Судалгааг хийсэн Лондоны их сургууль, коллежийн сэтгэцийн эрүүл мэндийн тасгийн ахлах судлаач, сэтгэл мэдрэлийн эмч доктор Натали Марчантын хэлснээр тогтмол сөрөг бодолд автах зуршил нь сэтгэцийн олдмол эмгэгийг бий болгох өндөр эрсдэлтэй гэжээ.

Тухайлбал өнгөрснөө эргэцүүлэн бодож санаашрах, харамсах, ирээдүйд санаа зовних зэргээр байнгын дадал болсон сөрөг бодлуудыг хоёр жилийн хугацаанд 55-аас дээш насны 350 гаруй хүн дээр ажиглажээ. Томографи шинжилгээнд хамруулахад тэдгээрийн 1/3 нь тархины сэтгэцийн олдмол эмгэгийн хамгийн нийтлэг төрөл Алцгеймерийн өвчнийг үүсгэдэг хоёр төрлийн тау, бета амилойд уургуудыг агуулах болсон байна.

Тодруулбал сөрөг бодолд илүү их хугацаагаар автдаг хүмүүст дээрх уургийн нийлэмжүүд их хэмжээтэйгээр ялгарчээ. Уг судалгааг цаашид үргэлжлүүлж нарийвчлах шаардлагатай гэж мэргэжилтнүүд үзсэн байна.

Сайн мэдээ нь хэрэв та амьдралаасаа эерэг талыг нь олж харч чаддаг өөдрөг нэгэн бол зүрх судасны өвчлөлөөр нас барах тохиолдол гутранги хүмүүсээс бага байх болно. Өөрөөр хэлбэл эерэг хүний зүрхний ажиллагаа илүү сайн байдаг ажээ.  Зүрх судасны үйл ажиллагаанаас гадна дархлааны систем сайжирч, дасгал хөдөлгөөн хийх, эрүүл зөв хооллох, амьсгалын эрхтэний үйл ажиллагааг дэмжих зэргээр бие организмыг идэвхтэй, эрүүл байхад тусалдаг байна. Тиймээс эерэг, өөдрөг байна гэдэг эрүүл мэндэд тустай зуршил юм.

Эх сурвалж: CNN

---