Эрүүл мэндийн яамны ээлжит хэвлэлийн бага хурал болж байна. Монгол улсад 179 тохиолдол бүртгэгдэж, 42 хүн эдгэж, эмнэлгээс гараад байгаа билээ. 

ЭМЯ-ны газрын дарга Д.Нарангэрэл:

-Коронавирус нь дэлхийн 216 улсад бүртгэгдээд байна. Тус өвчнөөр 6 сая 259 мянган хүн өвчилж, 371 мянган хүн нас барсан. Сүүлийн 24 цаг 108 мянган хүн шинээр өвчилж, 1000 гаруй хүн нас барсан нь өмнөх өдрийнхөөс өвчлөл 15 000 хүнээр буурсан таатай мэдээтэй байна.

Манай улсад дөрвөн хүн ажиглалтад шинээр орлоо. Мөн 39 хүн ажиглалтаас гарч гэрийн тусгаарлалтад шилжсэн байна. Өнөөдрийн байдлаар нийт 1,856 хүн ажиглалтын байранд байна. Үүнээс архаг хууч өвчтэй 116 хүнд 29 их эмч, 59 резидент эмч эмнэлгийн тусламж үйлчилгээ үзүүлж байна.

ХӨСҮТ-ийн захирал Д.Нямхүү:

-2020 оны тавдугаар сарын 31-нд 371 хүнд шинжилгээ хийснээс 365 хүний шинжилгээнд коронавирус илрээгүй. Тусгаарлагдсан зургаан хүнд давтан шинжилгээ хийхэд коронавирус илэрлээ. Тавдугаар сарын 13-нд Оросоос ирсэн цэргийн сургуулийн оюутнууд бөгөөд 18 хоногийн дараа вирусийн халдвар илэрлээ. Батлагдсан тохиолдол 185 боллоо.

---