Хятадын технологийн “Xiaomi” компани 6G сүлжээг урьдчилсан байдлаар туршсаныг “Синьхуа” мэдээллээ. Тус компанийг үүсгэн байгуулагч, ерөнхий захирал Лэй Жунь энэ талаар мэдэгдэхдээ, харилцаа холбооны шинэ үеийн технологи, стандартыг нутагшуулах судалгаа хийж, анхны туршилтуудыг эхлүүлснээ онцолжээ. Мөн зургадугаар үеийн холбоог туршихад хиймэл дагуулын интернэтийн далайцтай сүлжээ чухал гэж тэрбээр мэдэгдсэн.

Хэдийгээр коронавирусийн тархалтын улмаас шинэ үеийн 5G харилцаа, холбооны сүлжээнд шилжих ажил удааширсан ч тус компани гар утас, төхөөрөмжүүдээ 5G сүлжээг дэмждэгээр үйлдвэрлэсээр байх аж. Дэлхий даяар тогтоосон хөл хорионы дэглэмийн үед видео хурал, цуглаан зохион байгуулах, стрийминг үйлчилгээ зэрэг технологид суурилсан хэмнэлийг 5G сүлжээ улам хүртээмжтэй болгож байна гэж Лэй Жунь үзэж буй.

---