Дэлхийн хөлбөмбөгийн холбооны (FIFA) Сахилгын хороо нь Монголын хөлбөмбөгийн холбооны нэр бүхий тамирчид тоглолт наймаалцсан байж болзошгүй гэх хэргийг таван сарын турш мөрдөн шалгасны эцэст хэргийг хэрэгсэхгүй болгон хааж шийдвэрлэжээ.

Сахилгын хорооны хуралдаан 2020 оны тавдугаар сарын 04-ний өдөр болохоор анх товлогдсон талаар бид өмнө нь мэдээлсэн. Гэвч тодорхой шалтгааны улмаас хойшилж энэ сарын 20-ны өдөр хуралдан дээрх шийдвэрийг гаргажээ.

МХБХ-ны эрэгтэйчүүдийн шигшээ баг  Хөлбөмбөгийн 2022 оны ДАШТ, 2023 оны Ази тивийн АШТ-ий урьдчилсан шатны "F" хэсгийн дөрөв дэх тоглолтыг  2019 оны аравдугаар сарын 15-ны өдөр Киргизстаны шигшээ багтай хийх үедээ наймаалцаж, 2:1-ээр хожигдсон байж болзошгүй гэх асуудлыг МХБХ-ны Дэд ерөнхийлөгч Г.Дашням анх олон нийтэд дэлгэсэн бөгөөд уг үйлдлийнхээ төлөө МХБХ-ныхонд асар ихээр дарамтлуулж арга буюу албан тушаалаасаа чөлөөлөгдсөн юм.

---