Эрүүл мэндийн яамны 11 цагийн ээлжит хэвлэлийн бага хурал боллоо. 13 хүн нэмэгдэж, халдвар авсан хүний тоо 161 болж, 43 иргэн эдгэж, эмнэлгээс гараад байна. 

ХӨСҮТ-ийн захирал Д.Нямхүү: 

-ХӨСҮТ, Дархан-Уул аймгийн лабораторид тавдугаар сарын 27-ны өдөр нийт 517 хүний сорьцод шинжилгээ хийлээ. Үүнээс 504 хүний шинжилгээнд коронавирус илрээгүй. Шинжилгээний дүнг задалж танилцуулбал, ХӨСҮТ-д тусгаарлагдсан 40, ажиглах байранд байгаа 352, тандалтын зорилгоор цуглуулсан 19, ажиглах байранд тусгаарлагдсан 7 хүний давтан шинжилгээнд коронавирус илрээгүй байна. Дархан-Уул аймгийн лабораторид Алтанбулгийн боомтоор орж ирсэн 30 жолооч, аймгийн ажиглалтын байранд тусгаарлагдсан 69 хүний давтан шинжилгээнд коронавирус илрээгүй.

Харин 2020 оны тавдугаар сарын 27-нд 13 хүний шинжилгээнээс коронавирус илэрлээ. Тавдугаар сарын 26-ны өдөр Москва-Улаанбаатарын онгоцоор 170 хүн ирснээс давтан шинжилгээгээр нэг оюутанд халдвар илэрсэн. Мөн тавдугаар сарын 27-ны өдөр Алтанбулагийн боомтоор 340 хүн орж ирснээс, тэдний 12-оос нь коронавирусийн халдвар илэрсэн. Тэдний 10 нь оюутан.

Өнөөдрийн байдлаар батлагдсан тохиолдол нийт 161 боллоо. Эдгэрсэн 43, эмчлэгдэж байгаа 118 байна. Биеийн байдлыг үнэлэхэд хөнгөн 107, хүндэвтэр 11 хүн байна гэж үзэж байна. ХӨСҮТ-д өнөөдрийн байдлаар 165 хүн байна.

Коронавируст халдвар дэлхийн 216 улс орон, нутаг дэвсгэрт бүртгэгдэн, 5,780,000 гаруй хүн өвчилж, 356,000 гаруй хүн нас баржээ. 2,480,000 хүн эдгэрсэн бол одоогоор 2,9 сая хүн эмнэлэгт хэвтэн эмчлэгдэж байна. Сүүлийн 24 цагийн хугацаанд 101,000 тохиолдол шинээр нэмэгдэж, нас баралт 5,000 гаруй хүнээр мөн нэмэгдлээ.

Манай олон аймагтай хил залгаа Буриад, Эрхүү, Туваа мужуудад өвчлөл өмнөх өдрийнхөөс 58-70 тохиолдлоор нэмэгдсэн бол Эрхүү хотод өвчлөл өмнөх өдрөөс 42 тохиолдлоор буурчээ.

Зоонозын өвчин судлалын үндэсний төвийн баг өчигдөр нийт 186 ачаа тээш, 11 вагон, гурван зочид буудалд эцсийн халдваргүйжүүлэлт хийлээ. Орон нутгийн 14 чиглэлийн галт тэргэнд 10 гаруй эмч, эмнэлгийн ажилчин ажиллаж, 4,343 хүнд коронавирусийн талаарх тандалт судалгаа хийхэд одоогоор сэжигтэй тохиолдол илрээгүй байна.

24 цагийн хугацаанд 119 дугаарт 228 дуудлага ирж, коронавирусийн халдварын урьдчилан сэргийлэлт, клиникийн талаар зөвлөгөө авсан.

---