АНУ-ын баруун өмнөд хэсгийг үхлийн аюултай туулайн вирус “RHDV2” эзлээд байна. Гуравдугаар сарын эхээр Нью-Мексико хотод анх илэрсэн уг вирус Техас, Аризона, Колорадо, Невада, цаашлаад Калифорнийн нутгаар тархан, тэжээмэл болон зэрлэг туулайнуудыг ихээр устгажээ.

Энэхүү вирус нь коронавирус биш бөгөөд хүн, эсвэл бусад амьтанд халдсан тохиолдол илрээгүй. Зөвхөн туулайн төрөл зүйлд халдварладаг бололтой.

АНУ-ын Хөдөө аж ахуйн яамны мэдээлснээр халдвартай туулайнуудад халуурах, хоолны дуршилгүй болох, хавагнах, амьсгалын болон мэдрэлийн шинж тэмдгүүд илэрч болох аж. Гэвч ихэнх тохиолдолд туулай гэнэт үхсэний дараа л халдвартай болох нь илэрдэг байна.

Энэ бол Хойд Америкийн зэрлэг туулайн дунд дэгдэж буй анхны вирусийн халдвар юм. Энэхүү халдвар зэрлэг туулайн тоо толгойг багасгаж, тэр тусмаа ховордсон төрлүүдэд ихээхэн хор хөнөөл авчирна гэж Калифорнийн Загас болон зэрлэг амьтан судлалын төвийн зэрлэг амьтдын малын эмч Деана Клиффорд үзэж байна. Тэрээр “Харамсалтай нь, туулай нь олон махчин амьтдын түгээмэл олз учир тэдгээр төрөл зүйлүүдэд ч бас нөлөөлж болзошгүй юм” хэмээн нэмж хэлэв.

Коронавирусийн улмаас хүмүүс гэртээ тусгаарлалтад байгаатай адил гэрийн тэжээвэр туулайнууд ч гэртээ байх ёстойг холбогдох албаныхан сануулж байна. Мөн иргэдийг шинээр туулай тэжээхгүй байх, тэжээвэр туулайг зэрлэг туулайтай ойртуулахгүй байх, эрүүл ахуйг баримтлах, туулайтай харьцахаас өмнө болон дараа гараа угаахыг уриалжээ.

Эх сурвалж: huffpost.com

---