ОХУ-ын Дотоод хэргийн яамны эрүүгийн хэлтсийн ажилчид санхүүгийн байгууллагуудын аюулгүй байдлын албаны тусламжтайгаар “Дети войны” буюу “Дайны хүүхдүүд” хөтөлбөрийн нэрээр ахмад настнуудын тэтгэврийн мөнгийг завшсан сэжигтнийг баривчилжээ.

Москва хотын 68 настай оршин суугч данснаас нь мөнгө хулгайлагдсан хэмээн цагдаад хандсанаар энэхүү хэргийг шалгаж эхэлсэн байна. Түүний хэлснээр түүнд өөрийгөө хууль сахиулах байгууллагын ажилтан гэж танилцуулсан эрэгтэйгээс дуудлага ирсэн аж. Нэгэн эрэгтэй түүнд "Дайны хүүхдүүд" хөтөлбөрийн хүрээнд 1958 оноос өмнө төрсөн иргэдэд 250 мянган рубльтэй тэнцэх хэмжээний мөнгөн нөхөн олгохоор болсон гээд картын дугаар, нууц кодоо хэлэхийг хүсжээ. Удалгүй хохирогч дансны үлдэгдлээ шалгахад эрэгтэйн амласан мөнгө дансанд нь ороогүй, харин хадгаламж нь хулгайлагдсан болохыг олж мэдсэн гэнэ.

Хэдэн өдрийн дараа өөр нэгэн хохирогч цагдаад мэдүүлэг өгчээ. Мөн нийслэл хотын оршин суугч 80 настай нэгэн эмэгтэйн мэдээлснээр түүнд өөрийгөө дайны нөхөн олговрын хөтөлбөрийн ажилтан гэж танилцуулсан эрээс дуудлага ирсэн байна. Сэжигтэн эмэгтэйг зуучлагчид 120 мянган рубль өгвөл түүний нөхөн төлбөр гурав дахин нэмэгдэнэ гэж ятгасан аж. Эрэгтэйд итгэсэн хохирогч банкнаас мөнгө авч, сэжигтэнд хүлээлгэн өгөөд, хэсэг хугацааны дараа хууртагдсан гэдгээ мэджээ.

Эдгээр мэдүүлгүүдийн дагуу Дотоод хэргийн яамны Москва хотын Гагаринский дүүргийн мөрдөн байцаагч нар эрүүгийн хэрэг үүсгэн, мөрдлөг явуулсан байна.

Ингээд эрэн сурвалжлах ажиллагааны үр дүнд цагдаагийн албаныхан сэжигтэн этгээдийг Дмитрий Ульяновын гудамжны түрээсийн байрнаас баривчилжээ. Мөрдөн шалгах явцад цагдаа нар нотлох баримт бүхий банкны карт, гар утсыг хураан авсан байна. Сэжигтэн өмнө нь ижил төстэй хууль бус үйлдлээр ял эдэлж байсан нь тогтоогджээ.

---