Apple компаниас жил бүр зохион байгуулдаг WWDC буюу Дэлхийн программ хөгжүүлэгчдийн чуулган коронавирусийн дэгдэлтийн улмаас энэ жил цахимаар явагдахаар болжээ.

Энэхүү чуулган зургаадугаар сарын 22-ноос эхлэх бөгөөд бүх хөгжүүлэгчид үнэ төлбөргүй нэгдэх боломжтой. Шууд дамжуулалт Apple Developer аппликейшн болон Apple Developer вэбсайт дээр болно. Жил бүр мянга мянган хүмүүсийг нэг дор цуглуулдаг уг хурал анх үүссэнээсээ 31 жилийн дараа анх удаагаа цахимаар зохион байгуулагдах гэж байна.

“31 дэх жилдээ ороод буй WWDC20 нь дэлхийн сая сая бүтээлч, шинийг санаачлагч программ хөгжүүлэгчдэд ирээдүйн iOS, iPadOS, macOS, tvOS, watchOS-тэй урьдчилан танилцах, мөн дэлхийн өнцөг булан бүрд байгаа Apple-ийн хэрэглэгчдийн амьдралыг баяжуулах аппликейшнүүдийг бүтээж буй манай компанийн инженерүүдээс суралцах боломжийг олгох болно" хэмээн компанийн албан ёсны мэдэгдэлд дурджээ.

Түүнчлэн Apple-ийн Олон улсын маркетингийн дэд ерөнхийлөгч Филл Шиллер “WWDC20 түүхэндээ хамгийн том хурал болж, дэлхийн өнцөг булан бүр дэх 23 сая гаруй программ хөгжүүлэгчдийн бидэнтэй нэгдэх юм. Ирэх зургаадугаар сард долоо хоногийн турш Apple-ийн платформуудын ирээдүйн талаар илүү ихийг мэдэх боломжтой. Бид программ хөгжүүлэгч хамт олонтойгоо цахимаар уулзаж, илүү гайхалтай программ, үйлчилгээнүүдийг бий болгоход туслах шинэ тоног төхөөрөмжүүдийг тэдэнтэй хуваалцахыг тэсэн ядан хүлээж байна” гэв.

Эх сурвалж: timesnownews.com

---