Дорнод аймагт газрын тосны 21-р талбайд ажиллаж байсан, тээврийн жолооч иргэнийг коронавирусийн халдварын сэжигтэй байж болзошгүй гэж үзэн тусгаарлажээ. 

"Петро Чайна Дачин Тамсаг" ХХК-ийн 21 дүгээр талбайн туслан гүйцэтгэгч компанийн жолооч иргэн “Б” энэ сарын 3-ны өдөр СOVID-19 халдварын шинж тэмдэг болох халуурч, хоолой нь өвдсөн дуудлага өгсний дагуу Дорнод аймгийн мэргэжлийн байгууллагууд газар дээр нь ажиллаж, тандалт хийн, хяналтад доор тээвэрлэн БОЭТ-ийн Халдвартын тасагт авчирчээ.

Эхний ээлжид нэг удаагийн түргэвчилсэн тестээр шинжлэхэд хариу нь сөрөг буюу халдваргүй гараад байна. Харин /PCR/ цусны шинжилгээний хариу шөнө 02:00 цагт гарах юм байна. 

Иргэн “Б” өвчний түүхийн асуумжид хоолой нь өвдөмтгий, хоёр хоногийн өмнө халууцан хүйтэн ус уусан тухайгаа хэлжээ.
Гэвч тухайн иргэн хилийн зоонд орж, тээвэрлэлт хийсэн учир Эрүүл мэндийн сайдын тушаалаар сэжигтэй тохиолдол буюу COVID-19-ийн халдвар авсан байж болзошгүй гэж үзэн нарийн шинжилгээ хийгээд байна.

Түүнтэй ойр хавьтлын найман иргэнийг ажиглалтад аваад байгаа ба өнөөдөр Дорнод аймгийн Онцгой комиссын шийдвэрээр 21 дүгээр талбай руу орж гарах хөдөлгөөнийг түр хугацаагаар зогсоогоод байгаа тус аймгийн Эрүүл мэндийн газрын дарга Ч.Оюунаа мэдээлэл өглөө.

---