Өмнө нь нэгэн хувийн компаниас цацаж байсан UFO буюу үл танигдах нисдэг биетүүдийг харуулсан гурван богино хэмжээний бичлэгийг АНУ-ын Пентагоноос албан ёсоор дэлгэжээ.

Хэт улаан туяаны камераар хийсэн уг бичлэгүүдэд үл танигдах нисдэг биетүүд маш хурдан хөдөлж байгаа нь харагдана. Уг бичлэгүүдэд мөн нисгэгчдийн гайхширч байгаа дуу бичигдсэн байна.

Эдгээр бичлэгүүдийн үнэн зөв байдлыг АНУ-ын Тэнгисийн цэргийн хүчин өнгөрсөн оны есдүгээр сард хүлээн зөвшөөрсөн. Харин Пентагоноос эдгээрийг одоо албан ёсоор дэлгэх болсон нь “Олон нийтийн дунд тархаад байсан уг бичлэгүүдийг бодит эсэх, мөн хасаж, нууцалсан хэсэг байгаа эсэх талаар буруу таамаглалыг арилгах зорилготой” хэмээн Пентагоны хэвлэлийн төлөөлөгч Сью Гоф хэлэв.

Тэнгисийн цэргийн эдгээр бичлэгүүдийг анх 2017 оны арванхоёрдугаар сараас 2018 оны гуравдугаар сарын хооронд үл танигдах агаарын үзэгдлүүдийг судалдаг “To The Stars Academy of Arts & Sciences” компани дэлгэсэн юм.

2004 онд эдгээр үл мэдэгдэх объектуудын нэгийг харсан тэнгисийн нисгэгч Дэвид Фравор CNN-д өгсөн ярилцлагадаа уг биет түүний тайлбарлаж чадахааргүй байдлаар хөдөлж байсан гэж мэдүүлсэн байна. Одоо тэтгэвэртээ гарсан тэрээр “Намайг ойртох үед тэр өмнөд зүг рүү хурдацтай хөдлөөд, хоёрхон секундын дотор алга болчихсон. Яг л хананд ойж байгаа ширээний теннисийн бөмбөг шиг маш огцом хөдөлгөөнтэй байсан” гэж хэлжээ.

Пентагон үл танигдах биетүүдийн бичлэгийг судалдаг нууц ангиллын хөтөлбөрийг 2007 онд эхлүүлж байжээ. Харин 2012 онд санхүүжилт шавхагдсан, илүү өндөр ач холбогдолтой асуудлууд байгаа гэж үзэн уг хөтөлбөрийг зогсоосон байна.

Энэхүү нууц төслийн дарга асан Луис Елизондо судалсан биетүүдийнхээ талаар "Эдгээр агаарын хөлгүүд АНУ болон бидний мэдэх гадаадын агаарын хүчинд байхгүй шинж тэмдгийг өөртөө агуулсан" гэж хэлжээ.

Эх сурвалж: CNN

---