“Будапешт-2018” бөхийн төрлүүдийн ДАШТ-ий тав дахь өдөр эмэгтэйчүүдийн 50, 53, 57, 62 кг-ын жингийн барилдаанаар эхэллээ. 62 кг-ын жинд 23 хүртэлх насны ДАШТ-ий хүрэл, насанд хүрэгчдийн Азийн АШТ-ий хүрэл, залуучуудын мөнгө, өсвөр үеийн хүрэл медальт, үндэсний шигшээ баг, “Хилчин” спорт хорооны тамирчин ОУХМ Э.Гантуяа эхний барилдаанаа Азийн АШТ-ий дөрвөн хүрэл медальтай БНСУ-ын Хан Жун Вонтой хийж 6:0-ээр ялав. Тэрбээр 1/8 шигшээд 23 хүртэлх насны ЕАШТ-ий хошой хүрэл медальт Туркийн Асли Тугсутай хүч үзнэ.

 А.Батцэцэг  Жон Ин Сумтайд сөхрөв

57 кг-ын жинд 23 хүртэлх насны ДАШТ-ий мөнгө, залуучуудын алт, өсвөр үеийн мөнгөн медальт, Азийн наадам болон Азийн АШТ-ий хүрэл медальт, үндэсний шигшээ баг, “Хасу-Мегастарс” клубын тамирчин ОУХМ А.Батцэцэг тэгшитгэлд БНАСАУ-ын Жон Ин Сумтай хийж цэвэр ялагдлаа. Ингэснээр тэрбээр Хойд Солонгосын бөхийг харах л үлдэв. Дашрамд дуулгахад урьдчилсан болон дагах барилдаан 16:30, хагас шигшээ барилдаан 22:45, финалын барилдаан 00:00 цагаас тус бүр эхэлнэ.

Х.Болортуяа тэмцээнээ өндөрлүүллээ

Эмэгтэйчүүдийн 65 кг-ын жинд Оросын цомын нээлттэй тэмцээний мөнгө, “Монголиа Опен” ОУТ-ий гурван хүрэл медальт, үндэсний шигшээ баг, “Аврагч” спорт хорооны тамирчин ОУХМ Х.Болортуяа өчигдөр 1/8 шигшээд барилдаанд оюутны болон залуучуудын дэлхийн аварга Канадын Сюзанне Лаппагед оноогоор цэвэр (0:10) ялагдсан билээ. Түүний өрсөлдөгч шигшээд шалгарч, дагах барилдаан гарсан бөгөөд энэ жилийн 23 хүртэлх насны Европын аварга ОХУ-ын Наталья Кузнецовад оноогоор ялагдаж тэмцээнээ өндөрлүүллээ.

 

---