Ерөнхий сайд асан Н.Алтанхуяг Монгол улсын Ерөнхийлөгчийн ахлах зөвлөхийн албан тушаалаа 2019 оны өдийд хүлээлгэн өгч, намаа шинэчлэх ажилд ханцуй шамлан орж байгаагаа мэдэгдэж байсан. Тэр үедээ  “С.Эрдэнэ УИХ дээр шившгийн юмнууд хийлээ гэж намын гишүүд надад хандаж байна. Тиймээс би амиа аргалж явж болохгүй нь ээ. Хамтраад намаа цэвэрлэнэ. Намаа цэвэрлэх ажилд гар биe оролцоно” гэж мэдэгдэж байсан билээ.

С.Эрдэнэтэй өстэй байх хэд хэдэн шалтгаан Н.Алтанхуягт бий. Намын даргын сунгаанд ялагдсан нь жижиг шалтгаан. Хамгийн том шалтгаан нь, Н.Алтанхуяг Ерөнхий сайдын албан тушаалаас унагасан хүмүүстэй одоо ч өстэй яваа. Үүнийгээ ч нуудаггүй. С.Эрдэнийн хувьд Н.Алтанхуягийг унагаах ажилд оролцож, сайдынхаа ажлыг дөрвөн жил хийх эрхээ авч байсан хүн. Үүнийг Н.Алтанхуяг мартаж чаддаггүйдээ ямар нэгэн аргаар С.Эрдэнийг намын даргаас авч хаяхаар тэмцсээр өдий хүрсэн юм.  

Үүний тулд “Нэгдмэл Монгол” хөдөлгөөн байгуулснаа ч зарласан. Ардчилал шинэчлэлийн намын ард байдаг нууц дарга ч гэгдэж яваа. Түүний тойрон хүрээлэгчид нь “АН-ыг шинэчилье” хэмээн хэд хэдэн удаа хэвлэлийн бага хурал хийсэн.

Товчхондоо, нартад С.Эрдэнэтэй нэг дээвэр дор орохгүй гэдгээ удаа дараа зарласан хүн бол Н.Алтанхуяг.

Хорхой биед нь хүрэхээр атирна гэгчээр С.Эрдэнэ Сонгинохайрханы гишүүнчлэлээс Н.Алтанхуягийг хаслаа гэх бор шувуу нэг нисгэж үзсэн. “Манай нам сүүлийн хоёр жилд шинэчлэгдэж байна. Н.Алтанхуяг гэдэг хүний үед манай намд ийм юм байгаагүй шүү дээ. Нам байгуулж, намыг шинэчилнэ гэж юу байхав дээ” гэж Ж.Батзандан, Л.Болдод ч, Н.Алтанхуягт ч хаяглан хэлж үзсэн.  

Н.Алтанхуягийн гуйж нэг үзээд болохгүй бол гуядаж үзэх тактик үр дүнгээ өгсөн бололтой, С.Эрдэнэтэй эргээд зүү орох зайгүй болж, Сонгинохайрхан дүүргээсээ нэр дэвших эрхээ авсан гэх мэдээлэл байна.

Хэдэн жил тэмцээд намдаа эргэн орсон нь өөрийнх нь хувьд Ардчилсан нам шинэчилэгдсэн гэж үзэж байгаа бололтой.

---