Дархан-Уул аймгийн Дархан сумын 15 дугаар баг, Их сургуулийн 4 дүгээр гудамжинд бага насны 3 хүүхэд хэрэглээний халуун усанд энэ сарын 5-ны 17:00 цагийн үед түлэгдэж нас барсан дуудлага иржээ. 

Тус аймгийн Онцгой байдлын газрын 2 алба хаагч, 1 автомашинтай 6 км замыг туулан 17:30 цагт очиход нас барсан Я /5 настай эмэгтэй/, А /4 настай, эмэгтэй/, Ц /1 нас 6 сартай, эмэгтэй/ нарын цогцсыг ЯТТТ-өөс аймгийн Нэгдсэн эмнэлэг рүү хүргэсэн байсан.

Иргэн Ч-х Орхон аймгийн Баян-Өндөр сумын харьяат бөгөөд 2019 оны 9 дүгээр сараас Дархан-Уул аймгийн Дархан суманд гэр бүлээрээ түр ирж, иргэн Г-ын эзэмшлийн 4 өрөө байрны 1 өрөөг түрээслэж амьдарч байсан юм.

Ажлын хэсэг тухайн айлд очиход угаалтуурын хэсэг бөглөрч хэрэглээний халуун ус хальж /шалнаас 2.5 см/ гоожсон байдалтай. Хальсан усан дотор уртасгагч залгуур цахилгааны эх үүсвэрт залгаатай орох боломжгүй байсныг аюулгүй болгож, цагдаагийн байгууллагын бүрэлдэхүүнтэй хамт орсон. Цагдаагийн болон прокурорын байгууллагаас ослын газарт үзлэг хийгдэж байна гэлээ. 

Иймд бага насны хүүхдээ хараа хяналтгүй удаан цагаар үлдээхгүй байхыг анхааруулж байна. 

Уг харамсалтай хэргээр гурван хүүхдээ алдсан ээж нь Дархан-Уул аймгийн тавдугаар цэцэрлэгт ажилладаг байжээ. Ингээд Дархан-Уул аймгийн Багш нарын ҮЭХ-ны гишүүн Мөнхтуяа багш өөрийн цахим хуудсаар дамжуулан эмгэнэлээ илэрхийлсэн байна. Тухайн ээжийн хувьд гурван хүүхдээ харж байхад цэцэрлэгийн удирдлагууд ажил дээрээ дуудсан гэх мэдээллийг тэрбээр өгөв.

---